Respublika ilmiy-amaliy konferensiyasi muvaffaqiyatli yakunlandi

179 Yangiliklar

          Andijonda o‘tkazilayotgan  “Profilaktik  tibbiyot: bugun va ertaga” mavzusidagi  respublika  ilmiy-amaliy  anjumani  2018-yil  9-iyun kuni o‘z ishini davom ettirdi.   Andijon davlat  tibbiyot  instituti bosh  binosi, ADTI klinikasi  hamda  Andijon  shahridagi   “Hamkor”  xalqaro biznes  markazida  ichki kasalliklar, jarrohlik kasalliklari, onalik va bolalikni muhofaza qilish, travmatologiya, neyroxirugiya va ortopedik kasalliklari bo‘yicha seksiyalarda ma’ruzalar  bo‘ldi.
      Xorijlik  olimlar, respublikamizdagi  tibbiyot markazlari va davolash- profilaktika muassasalaridan kelgan mutaxassislar, ADTI professor-o‘qituvchilari tomonidan  turli  mavzularda taqdimot  ma’ruzalari qilindi. Anjuman yakunida ishtirokchilar o‘rtasida ma’ruzalar va o‘tkazilgan mahorat  darslari   yuzasidan  muhokamalar, savol-javoblar  bo‘ldi, o‘zaro fikrlar almashildi. Anjuman yakuniga bag‘ishlangan tantanali yig‘ilishni institut rektori M.Madazimov  olib bordi.
 
        U o‘z so‘zida anjuman ishi muvaffaqiyatli o‘tganligini, bunda barcha professor-o‘qituvchilar va xodimlar  faol  hamda sidqidildan ishtirok etganligini  e’tirof etib, ularga va barcha ishtirokchilarga   o‘z tashakkurini  bildirdi. Tantanada institut ilmiy ishlar bo‘yicha prorektori, professor G‘.Xodjimatov so‘zga chiqib, ilmiy-amaliy anjuman rezolyutsiyasi qarorini o‘qib etitirdi.
        Qarorda profilaktik tibbiyotni yanada rivojlantirish, turli kasalliklarning oldini olish, Andijonda profilaktik tibbiyotga ixtisoslashgan ilmiy kengashni tashkil etish masalasini yakuniga yetkazish kabi qator dolzarb mavzular ko‘tarildi. Anjuman qarori yuzasidan  professorlar N.Mamasoliev, Y.Egamov, dotsent X.Tursunovlar o‘zlarining fikr-mulohaza va  takliflarini bildirdilar. Yakunda barcha ishtirokchilarga sertifikatlar topshirildi.
       Shuningdek, institut  foyesida  kitoblar  va milliy  liboslar ko‘rgazmalari  tashkil  etildi.   
       Mazkur  nufuzli anjuman barcha ishtirokchilar va mutaxassislar  uchun juda  foydali va samarali bo‘ldi. Ular  konferensiya  davomida profilaktik tibbiyot  sohasidagi eng  so‘nggi  yangiliklardan boxabar bo‘lishib, kerakli   ma’lumotlarga  ega bo‘ldilar.


Maqolaga ovoz bering:  

Do'stlaringizga ulashing: