Oliygoh haqida

777 Yangiliklar

           Andijon davlat tibbiyot instituti 1955-yilning 2-avgustida tashkil topgan bo‘lib, uning salohiyati va nufuzi yildan-yilga ortib bormoqda. Hozir oliy malakali shifokorlar tayyorlash bo‘yicha institutning respublikada alohida o‘rni bor.

Bugungi kunda institutda 35 nafar fan doktori, professorlar, 131 nafar fan nomzodi, dotsentlar faoliyat ko‘rsatmoqdalar.

O‘tgan yarim asrdan ziyod davr mobaynida institut amaliy tibbiyotga 28 mingdan ortiq yuqori malakali shifokorlar tayyorlab berdi. Ular Farg‘ona vodiysi, Respublikamizning boshqa viloyatlari hamda Mustaqil davlatlar hamdo‘stligi mamlakatlarida inson salomatligi yo‘lida samarali mehnat qilmoqdalar.

Mamlakatimiz mustaqillikka erishgach, institut eng zamonaviy jihozlar bilan ta’minlanib, ta’limning sifat va mazmuni tubdan yangilandi.

Institut qoshida O‘zbekistonda birinchilar qatorida telemarkaz tashkil etildi va bu markaz orqali yaqin va uzoq xorijiy davlat oliy o‘quv yurtlari va ilmiy-davolash markazlari bilan telemuloqotlar o‘rnatish imkoniyati yaratildi. Yirik ilmiy markazlar – Bakulev nomidagi Yurak-qon tomir jarrohligi va Burdenko nomli Neyrojarrohlik ilmiy-tekshirish instituti, Rossiya onkologiya ilmiy markazi, Volgograd tibbiyot akademiyasi va Germaniyaning onkologiya, urologiya markaziy klinikalari shifokor-olimlari bilan o‘tkazilgan telemuloqotlar fikrimizning isbotidir.

Akademiklar – Rinat Sulaymonovich Akchurin (Moskva), Yuriy Yevgenevich Virenkov, Vitaliy Vasilyevich Maleyev (Moskva), O‘zbekiston Qahramonlari – Oyshaxon Qo‘chqorova, Onesiya Seitova hamda O‘zbekiston Respublikasi Sog‘liqni saqlash vaziri Alisher Shodmonovlar shu institutda tahsil olganlar.

         Bugungi kunda institutda davolash, pediatriya, stomatologiya va vrachlar malakasini oshirish va qayta tayyorlash fakultetlari hamda davolash ishi, pediatriya ishi, kasb ta’limi (davolash ishi), oliy hamshiralik ishi, stomatologiya, farmatsiya va tibbiy profilaktika ishi ta’lim yo‘nalishlari mavjud.

Kafedralar zamonaviy texnologiyalar bilan jihozlangan. Ular institutning asosiy binosi, institut klinikasi va viloyat sog‘liqni saqlash muassasalaridagi o‘quv bazalarida joylashgan.

Ta’lim olayotgan talabalar soni davolash fakultetida 1333 nafarni, pediatriya fakultetida 1009 nafarni, stomatologiya fakultetida 358 nafarni, kasb ta’limi (davolash ishi) yo‘nalishida 175 nafarni, oliy hamshiralik ishi yo‘nalishida 118 nafarni, tibbiy profilaktika ishi yo‘nalishida 71 nafarni va farmatsiya yo‘nalishida 49 nafarni tashkil etadi.

          Institutda akusherlik va ginekologiya, terapiya, otorinolaringologiya, kardiologiya, oftalmologiya, yuqumli kasalliklar, dermatovenerologiya, nevrologiya, umumiy onkologiya, jarrohlik, tashxisning instrumental va funksional usullari, neyroxirurgiya, sog‘liqni saqlashni boshqarish, urologiya, morfologiya, narkologiya, travmatologiya va ortopediya, sud tibbiyoti ekspertizasi, sport tibbiyoti, pediatriya, bolalar jarrohligi, bolalar anesteziologiyasi va reanimatologiyasi, bolalar kardiologiyasi va revmatologiyasi, bolalar nevrologiyasi hamda nenatologiya mutaxassisliklari bo‘yicha 243 nafar magistrlar tayyorlanmoqda.

Axborot-texnologiyalar markazi va kafedralar 326 dan ortiq zamonaviy kompyuterlar, mini-tipografiya, skaner, rangli printer,  kserokslar bilan ta’minlangan. 9 ta kompyuter sinflari tashkil etilgan. Institutning rasmiy veb-sayti doimiy ravishda yangiliklar bilan boyitilib boriladi.

Axborot resurs markazidagi kitob fondida 286000 nomdan ortiq o‘quv va badiiy adabiyotlar jamlangan. Tibbiyotning eng yangi g‘oya va yangiliklari haqida axborot beruvchi elektron kutubxona faoliyat olib bormoqda.

         Institutning markaziy ilmiy-tadqiqot laboratoriyasida zamonaviy immunologik tekshirishlar va tadqiqotlar olib borilmoqda. Eksperimentlar o‘tkazish uchun vivariy mavjud.

Talabalarning darsdan bo‘sh vaqtlarini mazmunli tashkil qilish va fanlarni mukammal o‘zlashtirish maqsadida fan to‘garaklari tashkil etilgan. Iqtidorli yoshlarini qo‘lab-quvvatlash va ularning qobiliyatlarini ro‘yobga chiqarish hamda intellektual salohiyatini yuksaltirish borasida “Yosh olimlar” kengashining faoliyati yo‘lga qo‘yilgan bo‘lib, olib borilayotgan amaliy ishlar natijasida 2005 yildan beri institut talabalaridan 14 nafari O‘zbekiston Respublikasi Prezidenti Davlat stipendiyasini, 22 nafari Ibn Sino nomli Davlat stipendiyasini, 1 nafari Islom Karimov nomidagi Davlat stipendiyasini, 7 nafari O‘zbekiston Vrachlar Assotsiatsiyasi stipendiyasini, 8 nafari O‘zbeksiton sog‘liqni saqlash xodimlari kasaba uyushmasi markaziy kengashi va institut kasaba uyushmasi stipendiyasini qo‘lga kiritdilar.

700 o‘rinli institut klinikasi mavjud bo‘lib, MRT, doppler, skaner, endoskop kabi zamonaviy diagnostika jihozlari bilan ta’minlangan. Institutda Vertebrologiya,  kardioxirurgiya markazlari faoliyat ko‘rsatmoqda.

Klinikaning operatsiya zali, klinik bazalar va tug‘ruq majmualari zamonaviy distansion ta’lim tizimlari bilan jihozlangan.

         Operatsiya jarayonlari videokamera orqali o‘quv auditoriyalari va ma’ruzalar zallarida teleekranga uzatiladi. Talabalar amaliy o‘quv jarayonlarida o‘tkazilayotgan operatsiyalarni muhokama qilishlari va jarrohga o‘zlarini qiziqtirgan masalalari bo‘yicha savollar berish imkoniyatiga egadirlar. Operatsiya jarayoni videokassetalarga ko‘chirilib, keyingi mashg‘ulotlarda tahlil qilinadi.

         Hozirda institut Akademik N.N.Burdenko nomidagi neyrohirurgiya I.T.I., G.R.Derjavin nomidagi Tambov davlat universiteti, I.P.Pavlov nomidagi Sankt-Peterburg davlat tibbiyot universiteti, Jaypee gospital (Hindiston), Keimyung university, dongsan medical center (Koreya), Kyoln universiteti (Germaniya), Nijniy Novgorod travmatologiya, ortopediya ilmiy tekshirish instituti, N.N.Bloxin nomli Rossiya onkologiya ilmiy tekshirish markazi, Novosibirsk davlat tibbiyot universiteti, Novosibirsk travmatologiya va ortopediya ilmiy tekshirish instituti, Pavel Yozef nomidagi Koshitsa universiteti, (Slovakiya),Piza universiteti (Italiya), Rossiya xalqlar do‘stligi universiteti, Rossiya davlat diplomdan keyingi oliy ta’lim tibbiyot akademiyasi, Sankt-Peterburg davlat pediatriya instituti, Samara davlat tibbiyot universiteti, Samara “Reaviz” tibbiyot universiteti, Sahmyook medical center-Seoul Adventist hospital (Koreya), Sechenov nomidagi birinchi Moskva davlat tibbiyot universiteti, Xarkov milliy tibbiyot universiteti kabi bir qator horijiy tibbiy oliygohlar bilan mustahkam aloqalar o‘rnatgan.

         Institut olimlari bugungi kunda quyidagi:

  1. Asosiy yurak-qon tomir tizimida uchraydigan xastaliklarni zamonaviy va yangi texnologiyalar yordamidagi diagnostikasi, profilaktikasi, davolashning samarali usullarini ishlab chiqish va amaliyotga tatbiq etish.
  2. Farg‘ona vodiysi aholisi orasida asosiy yurak-qon tomir va surunkali noinfeksion kasalliklarning epidemiologiyasini o‘rganish, profilaktikasining samarali usul va vositalarini yaratish.
  3. Homilada, chaqaloqlarda, xar hil yoshdagi bolalarda hamda katta yoshdagi odamlarning ichki a’zolarini anatomo-topografik va gistologik xususiyatlarini yoshga qarab o‘zgarishlarini o‘rganish, maktabgacha va maktab yoshidagi bolalarni jismoniy taraqqiy etish xususiyatlari va amputatsiyadan keyin bosh miya, orqa miya va miyachaning po‘stloq va po‘stloq osti strukturasidagi morfometrik o‘zgarishlar.
  4. Onalar va bolalar salomatligini muhofaza qilish va yaxshilash bo‘yicha Farg‘ona vodiysining hududiy, mintaqaviy xususiyatlarini hisobga olgan holda kompleks tadbirlar ishlab chiqish va ularni amalga oshirish.
  5. Limfatik terapiya sohasidagi yangi texnologiyalarning klinik eksperimental uslublarini yaratish va ularni sog‘liqni saqlash sohasida amaliyotga tatbiq qilish.
  6. Surunkali 12 barmoq ichak yara kasalligini davolash va  asoratlarining oldini olish, davolash natijalarini yaxshilash, tashxis usullarini mukammallashtirish, qalqonsimon bez kasalligi tarqalishi va spelenomegaliya sindromida jarrohlik usulida davolash natijalarini yaxshilash.
  7. Farg‘ona vodiysi mintaqasida virusli gepatitlar, o‘tkir ichak kasalliklari, OIV-infeksiyasi va OITSning klinik-immunologik xususiyatlari, kechishi, ularni sog‘lomlashtirish choralarini takomillashtirish bo‘yicha ilmiy tekshiruv ishlarini olib borish.
  8. Jarohat, jarohatlanish, ortopedik kasallik, umurtqa, pog‘onasi va orqa miya patologiyasi, travmatologiyada klinik limfologiya muammolari.
  9. Farg‘ona vodiysi aholisini salomatlik ko‘rsatkichlarini aniqlash, tashqi muhit ta’sirini o‘rganish yo‘nalishlari bo‘yicha ilmiy-tadqiqot ishlarini olib bormoqdalar.

         Mustaqillik yillarida institut olimlari tomonidan 148 ta monografiya, 325 ta patent, 7125 ta ratsionalizatorlik takliflari, 13196 ta amaliyotga tatbiq etilgan ishlar tayyorlandi. O‘zbekiston ilmiy jurnallarida – 5500 ta, xorijiy ilmiy jurnallarda – 2080 ta maqolalar, 2237 ta xorijda bo‘lib o‘tgan konferensiya to‘plamlarida 40103 ta, Respublikada o‘tkazilgan konferensiya to‘plamlarida 7030 ta tezislar chop ettirildi va 316 ta ilmiy–amaliy anjumanlar o‘tkazildi.

          Hozirda institut jamoasi respublika sog‘liqni saqlash sohasini yanada rivojlantirish uchun yetuk raqobatbardosh mutaxassis kadrlar tayyorlash yo‘lida sidqi-dildan faoliyat yuritmoqda.


Maqolaga ovoz bering:  

Do'stlaringizga ulashing: