Andijon davlat tibbiyot instituti professor-o‘qituvchilari va talabalari Xonoboddagi Navro‘z tantanalarida qatnashdilar

image_pdfYuklab olish (pdf)image_printChop etish versiyasi

19- mart, tong pallasi. Xonobodda  erta tongdan  yangragan  karnay –surnay sadolari barchani sayilga chorladi. Navro‘zi olam kirib kelishi arafasida Xonobod shahri chiroyiga yana chiroy qo‘shildi. Ko‘zni  quvnatuvchi rango-rang gullar, turli bezaklar, ko‘klamni, Navro‘zni sharaflovchi  turfa shiorlar atrofga o‘zgacha ko‘rk, o‘zgacha fayz bag‘ishlaydi. Xonoboddagi Navoiy nomli istirohat bog‘iga viloyatimizning barcha shahar va tumanlaridan minglab yurtdoshlarimiz bayram sayliga tashrif buyurdilar.

Istirohat bog‘i hududida viloyatimizdagi barcha tashkilot, muassasa va korxonalarning vakillari tomonidan bayram yarmarkalari tashkil etildi.

Andijon davlat tibbiyot instituti rektori M.Madazimov boshchiligida oliygoh prorektorlari, bo‘lim boshliqlari, xodimlar kasaba uyushma qo‘mitasi, institut xotin-qizlar qo‘mitasi faollari, institut davolash, pediatriya, stomatologiya, Vrachlar malakasini oshirish va qayta tayyorlash  fakultetlari dekanlari, yoshlar ittifoqi faollari va talabalardan iborat jamoa ham bayram saylida faol qatnashdilar.

Bu yerda ajratilgan maxsus joylarda dasturxonlar yozilib, milliy va bahoriy taomlar- ko‘k somsa, qatlama, ko‘k chuchvara, turli shirinliklar bilan  bezatildi.

Shuningdek, sayilgohda  “Miss education Andijon” liboslar ko‘rik-tanlovi ham o‘tkazildi. Tanlovda ADTIning lobar va dilbar qizlari  “Milliy liboslar”, “Bayram liboslari” hamda “Kasbiy liboslar” nominatsiyalari bo‘yicha o‘z ko‘rgazmali chiqishlarini namoyish qildilar.

Xonobod bog‘ining  asosiy maydonida  Navro‘z tantanalari  o‘tkazildi. Xonobod uzra bahor bayrami tantanasini  viloyat hokimining birinchi o‘rinbosari A.Egamberdiev  ochib, Andijon viloyati hokimi, senator  Sh.Abdurahmonovning  viloyat ahliga bayram tabrigini o‘qib eshittirdi va tadbir ishtirokchilarini qizg‘in muborakbod etdi.

Bog‘ markazida jamuljam bo‘lgan viloyatimiz ahli hamda mehmonlar bayram dasturini ko‘tarinki  bahoriy kayfiyat, zavqu shavq bilan tomosha qildilar. Jajji bolajonlar-u, askiyachilar, taniqli san’atkorlar va yosh san’atkorlarning  chiqishlari barchani xushnud qildi. Dilrabo kuy-qo‘shiqlar, jozibali raqslar  dillarni yayratdi. Bayram dasturida Andijon  davlat instituti talaba yigit-qizlarining  chiqishlari  alohida olqishlarga sazovor bo‘ldi.

Ham sayohat, ham ziyorat  deganlaridek, Navro‘z tantanalaridan so‘ng, institutning 170 nafar professor-o‘qituvchilari va talabalari, shuningdek, ADTI klinikasi xodimlari “Fozilmon ota” ziyoratgohida bo‘lishib, bu muqaddas dargohni ziyorat qildilar. To‘kin dasturxon atrofida bayram tantanasini davom ettirdilar.   Tantanada institut rektori  M.Madazimov so‘zga chiqib, Navro‘z ayyomi bilan  barchani tabrikladi va o‘zining ezgu tilaklarini bildirdi.

Shundan so‘ng, bayram ishtirokchilari ADTI yoshlar ittifoqi faollari hamda viloyatimizdagi yosh san’atkorlar ijrosidagi kuy-qo‘shiqlarga yayrab raqsga tushdilar.

Tog‘  yon bag‘ridagi tabiat go‘zalligiyu, Xonobodning xush havosidan bahra olib miriqib dam oldilar.

 

822