Andijon viloyatidagi Oliy ta’lim muassasalari talabalari o‘rtasida “Andijon yoshlarni birlashtiradi!” shiori ostidagi talabalar festivali davom etmoqda.
Bugun Andijon Davlat tibbiyot instituti va Andijon Davlat universiteti talabalari o‘rtasida sportning futbol turi bo‘yicha final musobaqasi bo‘lib o‘tdi. Unda epchillik va chaqqonlikni qo‘ldan boy bermagan har ikki jamoa ishtirokchilari murosasiz kurash olib bordilar. Musobaqaning yakuniy natijalariga ko‘ra 1:1 hisobida do‘stlik g‘alaba qozondi. Sportning barcha turlarida faolliklarini ko‘rsata olishgan institutimizning sportchi yoshlari umumiy hisobda ochkolar bo‘yicha 2-o‘rinni qo‘lga kiritishdi.
Musobaqaning taqdirlash marosimi Andijon shahridagi Yoshlar markazida o‘tkaziladi. Jamoa a’zolariga kelgusi o‘yinlarda muvaffaqiyat tilab qolamiz.
