Dunyo bolalari uchun eng beg‘ubor va quvonchli bayram bu – Xalqaro bolalarni himoya qilish kuni. Albatta, bola bu – dunyo, bola bu – hayot mazmuning ajralmas bir qismidir. Bolalar o‘z tabassumlari orqali insonlar qalbida hayotga, yashashga bo‘lgan qiziqishni uyg‘otadilar. Ko‘zlarida ezgulik va mexr qalqib turgan bolajon musaffo osmonda erkin parvoz etayotgan qaldirg‘och misoli.
Butun dunyo bo‘ylab, har yilning 1 iyun kuni “Xalqaro bolalarni himoya qilish kuni” sifatida nishonlanadi. Kelajak tarix bilan bunyod etiladi deyilganidek, ushbu kuning ham o‘z tarixi bor. Bu kunni aynan 1-iyun sanasida nishonlashi taklifi 1925-yil Jenevada ilgari surilgan va 1950-yildan esa 1-iyun BMT shafeligida butun dunyoda “Xalqaro bolalarni himoya qilish kuni” sifatida nishonlanib kelinadi.
Bolalar huquqlarini himoya qilish haqida gap ketganda eng avvalo ko‘z oldimizga “Bola huquqlari to‘g‘risida”gi Konvensiya keladi. Mazkur Konvensiya Nyu-York shahrida BMT Bosh Assambleyasining 1989-yil 20-noyabrdagi qarori bilan qabul qilingapn. Respublikamiz mazkur Konvensiyaga O‘zbekiston Respublikasi Yuqori Kengashining 1992-yil 9-dekabrdagi Qaroriga muvofiq qo‘shildi.
Mamlakatimizda ham ushbu bayram har yili dillarda quvonch ila nishonlanadi, Sababi O‘zbekiston – bolajon yurt, xalqimiz esa azaldan bolajon xalq. Mustaqillikning dastlabki yillarida O‘zbekiston qo‘shilgan ilk xalqaro shartnomalar qatorida Inson huquqlari umumjahon deklaratsiyasidan so‘ng aynan Bola huquqlari to‘g‘risida konvensiya turishi ham buning yaqqol isbotidir.
Bolalarni himoya qilish kuni bayramining maqsadi keng jamoatchilik diqqatini muammoli bolalarga, ularning huquqlarini himoya qilishga, himoyalangan dunyoda yashash imkoniyatlariga, baxtli bolalikka ega bo‘lishlariga va o‘z mamlakatining to‘la-to‘kis va xotirjam fuqarosi bo‘lib o‘sishlariga qaratishdir. Dunyoda bolajonlar kulgisiyu sho‘x-shodon qiyqirig‘idan-da beg‘ubor narsa bo‘lmasa kerak. Osmon misol musaffo, timqora ko‘zlarini sizgaqadagancha, biyron tilda tinmay savol berayotgan, murg‘ak qalbi bilan olamdagi jamiki ajoyibotlarni o‘rganishga, mushohada qilishga urinayotgan bolakayning nurli chehrasiga boqqan har qanday inson hayot tashvishlarini unutadi. Zotan, farzandining saodatli va baxtiyor damlarini mudom ko‘rib yashash har bir inson umrining asosiy mazmunidir. FARZANDLAR kamoli roxatini ko‘ring!
Hayotimiz mazmuni bo‘lgan aziz Bolajonlarimizni umrlari uzok, Kelajagi porlok bo‘lsin! Aziz farzandlarimiz baxtiga vatanimiz tinch, osmonimiz musaffo dasturxonlarimiz to‘kin-sochin bo‘lsin!
BARCHA SHODLIK SIZLARGA BO‘LSIN, AZIZ BOLAJONLAR!.
M.M.Madazimov
Andijon davlat tibbiyot institut rektori, professor