Andijon davlat tibbiyot institutida “Qadring baland bo‘lsin, ona tilim!” shiori ostida bayram tadbiri o‘tkazildi

Davlat tili qabul qilinganligining 31 yilligi munosabati bilan tashkil etilgan til bayramini  ZOOM platformasi orqali institutning barcha professor-o‘qituvchilari, talabalari bilan birga institutning Rossiyaning Dog‘iston o‘lkasi, Janubiy Koreya, Pokiston, Nigeriya davlatlaridagi xorijiy talabalari ham onlayn tarzda kuzatib borishdi.

Tadbirni Andijon davlat tibbiyot instituti Yoshlar bilan ishlash bo‘yicha prorektori v.v.b M.M.Qo‘ziboyeva tabrik so‘zi bilan ochar ekan, barchamiz uchun muqaddas bo‘lgan ona tilimizning tarixi, uni uzoq o‘tmishdan to hozirgi kunga qadar bosib o‘tgan yo‘li, asrlar silsilasida sayqal topgan jihatlari haqida to‘xtaldi. Zero, respublikamiz prezidenti ta’kidlaganidek, “Xalqimizning ko‘p asrlik madaniy, ilmiy-ma’rifiy va badiiy tafakkuri, intellektual salohiyatining yorqin va bebaho mahsuli bo‘lgan o‘zbek tili jahondagi boy va qadimiy tillardan biridir”.

Tadbir dasturining badiiy qismida  she’riyatga oshufta ko‘ngilli talabalar – institutning oliy hamshiralik ishi yo‘nalishi 3-bosqich talabalari o‘zbek tilini, shu muqaddas zaminni, muhabbatni ulug‘lovchi she’rlar aytishdi. O‘zlarining ezgu maqsadlari sari qalblarida yuksak ishonch bilan dadil borayotgan talabalar tomonidan Uvaysiy, Nodirabegim g‘azallari havola etildi. Til bayrami ishtirokchilar – O‘zbekiston-Dog‘iston qo‘shma dasturi asosidagi fakultetning 1-kurs talabalari va xorijiy talabalar bilan ishlash fakulteti talabalari va ZOOM platformasida uni kuzatib turganlar qalbiga faxr-iftixor tuyg‘ularini bag‘ishladi.

Dilbar raqslar esa bayram ishtirokchilarining gulduros qarsaklari ostida olqishlab turildi.

Andijon davlat tibbiyot institutida Til bayrami tadbirlari ana shunday ko‘tarinki kayfiyatda davom etmoqda.

ADTI axborot xizmati




UniRank O‘zbekistonning eng yaxshi universitetlari nomini ma’lum qildi

UniRank O‘zbekistonning eng yaxshi universitetlari nomini ma’lum qildi
UniRank jahon reytingi O‘zbekistonning eng yaxshi universitetlari ro‘yxatini tuzdi. Reyting UniRank veb-saytida e’lon qilingan. U yerda mamlakatimizning 87 ta oliy ta’lim muassasasi nomi bor.

Ro‘yxat mualliflari reyting uchun asos sifatida universitetlarning rasmiy veb-saytlarining ommabopligi, litsenziyalash ko‘rsatkichlari, universitetlarning akkreditatsiyasi, o‘qituvchilarning ilmiy maqolalari va boshqalarning keltirilgan ko‘rsatkichlarini oldi.

Birinchi o‘ringa Mirzo Ulug‘bek nomidagi O‘zbekiston milliy universiteti loyiq ko‘rilgan. Umumjahon reytingida universitet 4122 o‘rinda. Ikkinchi va uchinchi o‘rinni Toshkent pediatriya tibbiyot instituti Nukus filiali hamda Toshkent to‘qimachilik va yengil sanoat instituti egallagan.

Dastlabki o‘nlikka kirgan universitetlar:

O‘zbekiston milliy universiteti – 4122 (jahon reytingidagi o‘rni);
Toshkent peditriya tibbiyot instituti Nukus filiali – 5752;
Toshkent to‘qimachilik va yengil sanoat instituti – 7611;
Samarqand davlat universiteti – 8652;
Nizomiy nomidagi Toshkent davlat pedagogika universiteti – 8779;
Toshkent tibbiyot akademiyasi – 9185;
Muhammad al-Xorazmiy nomidagi Toshkent axborot texnologiyalari universiteti – 9478;
Samarqand davlat tibbiyot instituti – 9685;
Buxoro davlat universiteti – 9940;
Andijon davlat tibbiyot instituti – 9981.
UniRank ma’lumotlariga ko‘ra, Afg‘onistonning eng yaxshi universiteti Afg‘onistondagi Amerika universiteti (6438), Qirg‘izistonning eng yaxshi universiteti Manas Qirg‘iz-turk universiteti (4392), Qozog‘istonning eng yaxshi universiteti Nazarboev universiteti (1485), Tojikistonning eng yaxshi universiteti akademik Osimiy nomidagi Tojik texnik universiteti (11959), deb topilgan. Turkmaniston oliygohlari haqida ma’lumot mavjud emas.

http://www.webometrics.info/en/Asia/Uzbekistan

 




Andijon davlat tibbiyot institutida “Til – millat ko‘zgusi” mavzusida respublika onlayn ilmiy-nazariy konferensiya o‘tkazildi

21 oktabr – O‘zbek tiliga davlat tili maqomi berigan kun munosabati bilan Andijon davlat tibbiyot instituti o‘zbek tili va adabiyoti kafedrasi tashabbusi bilan o‘tkazilgan “Til – millat ko‘zgusi” mavzusida onlayn ilmiy-nazariy konferensiyada  tilshunos, adabiyotshunos olimlar, o‘zbek tili yo‘nalishilari bo‘yicha ilmiy izlanishlar olib borayotgan magistlar, talabalar ishtirok etdilar.


Onlayn ilmiy-nazariy konferensiyani Andijon davlat tibbiyot instituti Yoshlar bilan ishlash bo‘yicha prorektori v.v.b M.M.Qo‘ziboyeva tabrik so‘zi bilan ochar ekan, o‘zbek tilining nufuzi, mamlakat ijtimoiy-siyosiy hayotidagi o‘rni xususida to‘xtalib o‘tdi.

Shundan so‘ng ilmiy ma’ruzalar tinglandi. Andijon davlat tibbiyot instituti O‘zbek tili va adabiyoti kafedrasi o‘qituvchisi M.Bekiyeva, Toshkent davlat o‘zbek tili va adabiyoti universiteti tayanch doktoranti A.Hasanov, QDPI Maktabgacha va boshlang‘ich ta’limda ingliz tili kafedrasi o‘qituvchisi K.Oripova, Andijon davlat universiteti pedagogika fakulteti boshlang‘ich ta’lim metodikasi kafedrasi o‘qituvchisi M.Madaminova, ADU doktoranti H.Ismoilov va boshqalarning «O‘zbek tilining davlat tili sifatida rivojlantirish muammolari”, “Til har bir millatning buguni va kelajagini belgilab beruvchi omildir”, “O‘z ona tilisini yo‘qotgan har qanday millatning o‘zligidan judo bo‘lishi muqarrar”, «Ta’limda til sofligini saqlash muammolari”, «O‘zbek tilining davlat tili sifatidagi nufuzini yanada takomillashtirish yo‘llari” kabi mavzulardagi ma’ruzalari konferensiyaning onlayn ishtirokchilari tomonidan qiziqish bilan qabul qilindi.

Ma’ruzalar yakunida o‘zbek tili mutaxassislari va konferensiya ishtirokchilari o‘rtasida mavzu yuzasidan savol-javoblar bo‘lib o‘tdi.

“Til – millat ko‘zgusi” mavzusidagi onlayn ilmiy-nazariy konferensiya o‘z ishini muvaffaqiyatli yakunladi.

ADTI axborot xizmati




Halovatidan kechganlar

Andijon shahri kasalxonasining koronavirus infeksiyasiga chalingan bemorlarni davolashga ajratilgan hududi shifokorlar uchun ham, bemorlar uchun ham tashvishli. Tez yordam mashinasi kimnidir yuqori isitma bilan olib kelsa, kimdir nafas ololmay iztirobda, shundaylar borki, tezkorlik bilan reanimatsiyaga yotqizilishi kerak.

Shifokorlarda tinim yo‘q. Ular sutkasiga 3 marta almashadilar. Sakkiz soat davomida maxsus kiyimlarni, ko‘zoynaklarni, qo‘llarni, oyog‘idagi rezina etiklarni yechmaydi. Shu vaqt davomida ovqat iste’mol qilish, hojatga borish ham mumkin emas. Chunki himoya vositalari ochilsa, virus darhol yopishadi. Shifokorlar har bir bemorning holatidan voqif bo‘lishib, darhol yordam ko‘rsatish harakatida yuradilar, hamshiralar kuniga uch mahal davolash muolajalarini amalga oshirsalar, sanitarlar harbir joy gigiena talablari darajasida bo‘lishga erishmoqdalar. Maxsus kiyimlar ortida shifokorlarni bir-birlaridan ajratish qiyin.

 Poytug‘dagi tuman markaziy shifoxonasidanman,  deydi vrach Leniza Dautova. – Pulmonologman. Meni mazkur kasalxonada ishlashga taklif etishdi. Ishimiz og‘ir, vazifamizni yomon bajarmayapmiz.

– Og‘ir bemor sog‘ayib, bizga minnatdorligini bildirib, oilasiga, ish joyiga qaytganda butun charchog‘imiz yozilib ketganday bo‘ladi,  deydi kasalxona 2-bo‘limining mudirasi, terapevt Zulxumorxon Turg‘unova. – Sog‘ayib ketayotganlarning ko‘pchiligi bizni ruhan tetiklashtiryapti, o‘zimizga bo‘lgan ishonchni oshiryapti. Kasalxonamizda ishlayotganlarning birontasini alohida ko‘rsatishni xohlamagan bo‘lardim. Chunki butun jamoa yeng shimarib mehnat qilmoqda.

Shunga qaramay, tojdor virus surunkali kasalliklari bor, ayniqsa, keksa yoshdagi nuroniylar, momolarimizni oramizdan olib ketayotgan holatlar ham yo‘q emas. Palatalardan birida yotgan 66 yoshli nuroniy Ibrohimjon ota Muzaffarov dardi og‘ir. U mana 12 kundirki umr yo‘ldoshi Rafiqaxon bilan “Covid-2019” tufayli kasalxonaga keltirilgan edi. 65 yoshli mushtipar onaning yurak xastaligi bor edi. U kasallikni ko‘tara olmadi. Ibrohimjon otaning ahvoli yaxshilinib boryapti. Otaxonning shifo topishiga shubha yo‘q. Ammo 46 yil birga umr kechirib, 2 qiz, 3 o‘g‘ilni voyaga yetkazgan, shirindan shakar nabira va chevaralar davrasida umrguzaronlik qilayotgan umr yo‘ldoshidan ayrilish otaga naqadar uqubat berayotganini bir ko‘rishda sezasiz.

Bugun ko‘chalarda, bozorlarda turli marosimlar, to‘ylarda, jamoat joylarida virusni yuqtirib olishdan qo‘rqmay, nopisanda yurgan odamlarni uchratishga odatlanib qoldik. Koronavirusning og‘iri ham, yengili ham o‘ta xavfli ekanligini yaxshi anglab yetmayapmiz.

Ayniqsa, uning yengil turi bilan og‘irganlar o‘ziniboshqalardan ayirmay, jamoat joylari, savdo do‘konlari, bozorlardamana shu kasallikka o‘nlabkishilarning yo‘liqishiga sababchi bo‘lishyapti.

Butun dunyoni tahlikaga solgan koronavirusga nopisanda qaramaylik, yurgan yo‘limizda o‘zimizni ham, o‘zgalarni ham avaylaylik. Bu  shu kunning falsafasi, mantig‘i, sog‘lom fikri.

To‘lqin SIDDIQ,

faxriy jurnalist

manba: AUZ.uz




Diqqat e’lon!!! Hurmatli talaba va ota-onalar diqqatiga!

Hurmatli talaba! Hurmatli ota-ona!

Oliy va o‘rta maxsus ta’lim vazirligining tashabbusi bilan oliy ta’lim muassasalarida o‘quv jarayonini an’anaviy yoki masofaviy shaklda davom ettirish maqsadida talabalar va ularning ota-ona(vasiy)lari o‘rtasida ijtimoiy so‘rovnoma o‘tkazilmoqda.

Sizning savollarga ob’ektiv javob berishingiz o‘quv jarayonini an’anaviy yoki masofaviy shaklda davom ettirish masalasiga oydinlik kiritib berishda yordam beradi. So‘rovnoma anonim tarzda o‘tkaziladi, unda respondentning ism-sharifi ko‘rsatilmaydi.

So‘rovnoma joriy yilning 20-oktyabr kuni soat 23:59 ga qadar o‘tkaziladi. Sizdan mazkur so‘rovnomada faol ishtirok etishingizni so‘rab qolamiz.

Sizga so‘rovnomadagi ishtirokingiz uchun avvaldan minnatdorchilik bildiramiz.

Сўровномага ўтиш учун қуйидаги ҳаволини босинг!

 




Andijon davlat tibbiyot instituti vakillari “РОСОМЕД -2020” sovrindorlari

Joriy yilning 14-16 oktabr kunlari Rossiyaning tibbiyotda simulyatsion ta’lim jamiyati (ROSOMED)ning “РОСОМЕД -2020 Симуляционное обучение в медицине: опыт, развитие, инновации” mavzusidagi IX syezdi va xalqaro onlayn konferensiyasi bo‘lib o‘tdi.

Ushbu syezd va konferensiya doirasida “Simulyatsion markaz haqida eng zo‘r video rolik” nominatsiyasida o‘tkazilgan konkursda institutimizning simulyatsion o‘quv markazi direktori, t.f.n., dotsent Umid Donaqo‘ziyevich Usmonov tomonidan yuborilgan videorolik “Приз зрительских симпатий” nominatsiyasi bo‘yicha fahrli birinchi o‘rinni egalladi hamda maxsus guvohnoma, 20000 Rossiya rubli va “Akademiks 3D virtual patsienti dasturining litsenziyasi”ni qo‘lga kiritdi.

Shu bilan birga Andijon davlat tibbiyot instituti ichki kasalliklar propedevtikasi kafedrasi assistenti S.Kityan ushbu xalqaro onlayn konferensiyada faol ishtiroki uchun maxsus sovg‘a bilan taqdirlandi. Ushbu konferensiyada ishtirok etgan institutimizning barcha professor-o‘qituvchilari xalqaro sertifikatga ega bo‘ldilar.

“Akademiks 3D virtual patsienti dasturidan lavhalar.




TIL –  MILLAT  RAVNAQI

O‘zbekiston Respublikasi Oliy Kengashi o‘zining 1989-yil  oktabr oyidagi sessiyasi kun tartibiga “Davlat tili” to‘g‘risidagi masalani qo‘ydi va “O‘zbekiston hududida davlat tili o‘zbek tilidir” degan tarixiy Qonunni qabul qildi. O‘zbek tilining davlat tili sifatidagi huquqiy asoslarini ham belgilab berdi.

2020-yilga kelib, millat tili davlat siyosati darajasiga ko‘tarildi. Muhtaram yurtboshimiz Sh.M.Mirziyoev davlat tili qabul qilingan kunni “O‘zbek tili bayrami” sifatida keng miqyosda nishinlanishii  haqida farmon berdi.

          Qonunni qadrlamoqning sharti shuki, har birimiz ona tilimizning boy ifoda imkoniyatlarini puxta o‘rganishimiz, adabiy tilimizning yozma va og‘zaki me’yorlarini yaxshi bilishimiz, bu tilda yuqori savodxonlik bilan ish ko‘rishga intilishimiz zarur. “Tilga e’tibor – elga e’tibor” deb bejiz aytilmagan hikmatlarda. Bu hikmat Qonunning ham ayni talabidir.

O‘zbek tiliga Davlat tili maqomi berilishi va uning qonun yo‘li bilan himoya qilinayotganligi ayni muddao bo‘ldi. Shu o‘tgan davr mobaynida til o‘rganish sohasida talaygina ibratli ishlar qilindi. Ko‘z ko‘rib, dil quvonadigan yutuqlar qo‘lga kiritildi.

Tibbiyot oliy o‘quv yurtlaridagi o‘zbek tili darslarida og‘zaki nutq o‘stirish, shuningdek, matn va tasvirlar tuzish, lug‘at ustida ishlash kabi vositalar yetakchi o‘rinda turadi. Til o‘qitish jarayoni yoshlarni axloq-odob ruhida tarbiyalash bilan uzviy bog‘liqdir. Bu masalada “Navoiynoma”ga murojaat qilish mumkin. Chunki Alisher Navoiy – o‘zbek adabiyoti va tilining payg‘ambari. Mo‘tabar bobomiz – nafosat va odob qasrining binokori va bosh faylasufi. Uning badiiy, tarixiy, tilshunoslik va dinshunoslik (tasavvuf)ga oid barcha asarlarda Jayxun kabi to‘lg‘anib oqadigan eng sersuv daryo – odob daryosi. “Mahbubul-qulub”- “Qalblar suyuklisi” asari esa hadis janri va g‘oyalari yo‘lida bitilgan axloq haqidagi falsafiy qomusdir. A.Navoiy ijodiyotini bosh g‘oyaga jalb qilsak, uni odobnoma deb atash mumkin. Demak, “Navoiynoma” -til muammolarinigina hal qilmay, insonlar orasidan ko‘tarilgan mehr-oqibat, rahm-shafqat, vafo va sadoqat, or –nomus va hayo kabi insoniy fazilatlar haqida ham bahs yurita oladi.

Talabalarni komil inson qilib tarbiyalashda, ularda shu fazilatlarni shakllantirishda ustoz-pedagoglarning roli katta. Shunday ekan, har bir darsda Navoiy asarlaridan, hikmatli so‘zlaridan, tabobatga oid fikrlaridan foydalanishga keng yo‘l berilishi ayni muddaodir. Toki foniylik va abadiylik uchrashgan nuqtalar, o‘lim va hayot to‘qnashgan chorrahalar, yo‘qlik va borlik kesishgan daqiqalarda umr qadri, inson qadriyati qanchalik bebaho ekanligini to‘la anglasinlar. Navoiynig “Umr o‘tar yeldek, o‘zingni shod tut, Yelga yetmak mumkin ermasdur chu surat kurguzib ” deganini, “Jondin seni ko‘p sevarmen, ey umri aziz” – deya insonlarga quchoq ochganini unutmasinlar. Bo‘lg‘usi shifokor qizlarimizni iffat, hayo, odob, nafislik, muhabbat; mard yigitlarimizni esa vafodorlik, jasurlik tark etmasin, ular uchun “Essiz, taqdir ekan, qaydin bilibmiz, Azizim, dunyoga bevaqt kelibmiz”, – deya nadomat qilish begona bo‘lsin.

O‘ylaymizki, o‘z faoliyatini davr talablari  asosida tashkil qilishga odatlangan institut jamoasi “Davlat tili ” haqidagi qonun ijrosini ta’minlashda bundan buyon ham ijodiylik va  mas’uliyat bilan mehnat qiladi.

Har bir ziyoli inson tilimiz ravnaqi, ona tilimiz egalarining nutq madaniyati rivoji uchun jonbozlik ko‘rsatsin.

Mahfuza Qo‘ziboyeva

Andijon davlat tibbiyot instituti yoshlar bilan ishlash bo‘yicha prorektor v.v.b.




“Симуляционное обучение в медицине: опыт, развитие, инновации” Xalqaro onlay konferensiyasi davom etmoqda

  Rossiya Tibbiyotda simulyatsion o‘qitish jamiyati (РОСОМЕД)ning  IX syezdi doirasida tashkil etilgan onlay konferensiya 16 oktabr kuni ham o‘z ishini davom ettirdi. Rossiya, Fransiya, Belgiya, Turkiya kabi davlatlarning yetuk mutaxassislari ishtirok etayotgan xalqaro konferensiyada Andijon davlat tibbiyot institutining professor-o‘qituvchilari ham onlayn ravishda faol  ishtirok etishmoqda.

Tibbiy ta’limda simulyatorlardan foydalanish tajribalari, taraqqiyoti, innovatsion yangiliklari bilan tanishtirish maqsadida o‘tkazilayotgan  xalqaro onlayn konferensiyada   simulyatorlardan samarali foydalanish borasida taqdimotlar juda qiziqish bilan qabul qilinmoqda.

E’tiborli jihati, konferensiyada 2D, 3D formatlarda ko‘rgazmali qo‘llanmalar taqdim etilmoqdaki, bu tibbiy ta’lim jarayonida kasbiy ko‘nikmani shaklanishiga juda yaxshi samara beradi.

Onlayn ishtirokchilar tomonidan “Симуляционное обучение в медицине: опыт, развитие, инновации” xalqaro konferensiyasi yuzasidan ijobiy fikrlar bildirilmoqda.

ADTI axborot xizmati.




Andijon davlat tibbiyot instituti professor-o‘qituvchilari  “Симуляционное обучение в медицине: опыт, развитие, инновации” Xalqaro onlayn konferensiyasida

Rossiya Tibbiyotda simulyatsion o‘qitish jamiyati (РОСОМЕД)ning  IX syezdi doirasida tashkil etilgan onlayn konferensiyasida tibbiy ta’limda simulyatorlardan foydalanish tajribalari, taraqqiyoti, innovatsion yangiliklari yuzasidan taqdimotlar o‘tkazilmoqda.

Shuningdek, konferensiyada turli tanlovlar, jumladan, simulatsion ta’lim yo‘nalishi bo‘yicha eng yaxshi videoroliklar tanlovi ham o‘tkazilmoqda.

Rossiya, Fransiya, Belgiya, Turkiya kabi davlatlarning yetuk mutaxassislari tibbiy ta’limda  simulatorlardan samarali foydalanish borasida taqdimotlar qilayotgan xalqaro onlayn konferensiyada  Andijon davlat tibbiyot instituti rektori v.v.b. G‘.Xodjimatov, o‘quv ishlari bo‘yicha prorektor v.v.b B.Abdullajonov, Axborot  texnologiyalari bo‘yicha prorektor v.v.b. Z.O‘tanov, o‘quv bo‘limi boshlig‘i Q.Yusupov, fakultetlar dekanlari, kafedra mudirlari hamda professor-o‘qituvchilari ham onlayn ravishda o‘zlarini qiziqtirgan savollar bilan faol  ishtirok etmoqdalar.

“Медкомплекс», “ Виртумед” kabi bir qator tashkilot va muassasalar bilan hamkorlikda o‘tkazilayotgan konferensiyadagi taqdimotlar, ko‘rgazmali mashg‘ulotlar, albatta,  tibbiy ta’lim tizimida zamonaviy  o‘quv jihozlaridan foydalanish samaradorligi oshirishga munosib hissa qo‘shadi.

ADTI axborot xizmati.




2020-2021 o‘quv yili uchun Respublika oliy ta’lim muassasalaridan Andijon davlat tibbiyot institutining turdosh bo‘lmagan ta’lim yo‘nalishlariga o‘qishini ko‘chirishga ruxsat berilgan talabalar ro‘yxati

2_5204261784378149301(1)