Ijtimoiy tarmoqlardagi kanallardan birida “Андижон вилоятидаги Мед институти ректори узбек тили кабул килинган кунда барча укитувчилар уйида туриб оркасига еки енига байрок куйиб, байрок хакида шеьр айтиб видеога олиб ролик учун юборишни таькидлаб мажбурламокда” (murojaat tahrirsiz) degan, xabar tarqaldi. Ushbu holat yuzasidan o‘rganishlar olib borildi va unga ko‘ra quyidagilarni maʼlum qilamiz.
Joriy yilning 13-noyabr kuni Andijon davlat tibbiyot institutida O‘zbekiston Respublikasi Davlat bayrog‘i qabul qilinganligining 32 yilligini munosib tarzda nishonlash bo‘yicha yig‘ilish o‘tkazilgan. Unda ma’naviyat va ma’rifat bo‘limi mas’ullari, fakultetlar dekan o‘rinbosarlari ishtirok etgan. Yoshlar masalalari va ma’naviy-ma’rifiy ishlar bo‘yicha birinchi prorektor Vatan bayrog‘ini oiladan boshlab qadrlash lozimligini qayd etib, institut xodimlari va o‘qituvchilarining xonadonlariga davlat bayrog‘ini o‘rnatish taklifini bergan. Mazkur jarayonda majburlash holatlari bo‘lmagan.
Shuningdek, xabarda “institut rektori tomonidan topshiriq berilgan” degan mazmundagi ma’lumot haqiqatga mos emasligini ma’lum qilamiz. Boisi, institut rektori joriy yilning 13-14-noyabr kunlari Samarqand shahrida o‘tkazilgan O‘zbekiston-Turkiya oliy ta’lim muassasalarining II xalqaro ta’lim forumida ishtirok etgan.