Atrofidagilarga yaxshilik ilinib yashgan har bir inson qadr topadi va el xotirasida abadiy qoladi. Andijon davlat tibbiyot instituti yuqumli kasalliklar kafedrasi dotsenti, marhum Mirzahamdam Rahimovich Yulchiboyev ana shunday elda qadr topgan va dillarda abadiy yashovchi yurtdoshlarimizdan.
Institut yoshlar bilan ishlash, ma’naviyat va ma’rifat bo‘limi tomonidan onlayn ravishda o‘tkazilgan xotira tadbirida M.R.Yulchiboyevning go‘zal fazilatlari, ezgu niyat ila amalga oshirgan ishlari yodga olindi.
Onlayn xotira tadbirini yoshlar bilan ishlash bo‘yicha prorektor P.X.Asxanov olib bordi. Tadbirda yuqumli kasalliklar kafedrasining professor-o‘qituvchilari, marhumning qarindosh-urug‘lari va 100 dan ziyod talabalar onlayn ravishda ishtirok etishdi.
Xotira tadbirida so‘z olgan yuqumli kasalliklar kafedrasi katta o‘qituvchilari K.A.Mulladjanova, Ya.M.Yuldashyev va S.Komilovlar ustozning ibratli hayot yo‘li, samarali mehnat faoliyati, ilmiy izlanishlari, shogirdlariga ko‘rsatgan mehri xususida so‘z yuritdilar.
Tadbir davomida namoyish etilgan, ustozning namanganlik shogirdlari tomonidan yuborilgan videorolikda M.R.Yulchiboyevning mehridaryo, bag‘rikeng, sahovatli va talabchan inson bo‘lganligi e’tirof etildi.
Onlayn xotira tadbiri yakunida yoshlar bilan ishlash bo‘yicha prorektor P.X.Asxanov tadbir ishtirokchilariga minnaddorchilik bildirib, Andijon davlat tibbiyot instituti yuqumli kasalliklar kafedrasi dotsenti, marhum M.R.Yulchiboyevning hayoti yosh avlod uchun ibrat maktabi ekanligini alohida ta’kidlab o‘tdi.
ADTI axborot xizmati