ADTI ilmiy kengashlar zalida institut xotin-qizlar qo‘mitasi, yoshlar bilan ishlash ma’naviyat va ma’rifat bo‘limi va O‘zbekiston “Adolat” SDP viloyat Kengashi bilan hamkorlikda “Yoshlarni oilaviy hayotga tayyorlash” mavzusida davra suhbati tashkil etildi. Davra suhbatiga “Oila” ilmiy-tadqiqot amaliy markazi viloyat bo‘limi rahbari L.Jalolova va mehmonlar taklif etildi.
Davra suhbatini institut xotin-qizlar qo‘mitasi raisi M.Jo‘raeva ochib, oila masalalari bugungi kunning dolzarb va hamma vaqt muhim mavzusi bo‘lganligini, uning mustahkam va baxtiyor bo‘lishi har bir yoshga bog‘liq ekanligini ta’kidladi.
Tadbirda institut psixologi O‘.Arziqulov so‘z olib, “Oilaviy munosabatlarda nizolarni bartaraf etishning psixologik yechimlari” mavzusida ma’ruza qildi.
“Oila” ilmiy – tadqiqot amaliy markazi viloyat bo‘limi rahbari L.Jalolova, Andijon shahridagi 3 – umumta’lim maktabi direktori M.Qodirovalar so‘zga chiqib, oilani ilmiy asosli boshqarish, oilaning huquqiy asoslari, er-xotinning vazifalari, burchlari, zamonaviy oilalarda ma’naviy, milliy qadriyatlarning ahamiyati mavzularidagi hayotiy suhbatlari bilan talalalar e’tiborini tortdilar.
Davra suhbati qiziqarli, savol-javoblarga boy tarzda o‘tib, qatnashuvchilarda katta taassurot qoldirdi.