Bugun, 25-aprel kuni Andijon davlat tibbiyot institutida “Maʼrifat ulashib” loyihasi doirasida O‘zbekiston xalq shoiri, Andijon farzandi Muhammad Yusuf tavalludining 70 yilligi munosabati bilan “Xalq mehrini qozongan shoir” mavzusida adabiy-badiiy tadbir bo‘lib o‘tdi.
Tadbirni institut rektori M.Madazimov kirish so‘zi bilan ochib, Muhammad Yusuf o‘zining qisqa, ammo mazmundor umri davomida boy adabiy meros qoldirganligi, vatan ozodligi, xalq baxti, yurtning nurafshon kelajagini yonib kuylagan asarlari xalqning eʼtirofiga sazovor bo‘lgani va qalblardan chuqur joy olganligi haqida aytib o‘tdi.
Shundan so‘ng, O‘zbek tili va adabiyoti, tillar kafedrasi dotsenti M.Qo‘ziboyeva, Xotin-qizlar bilan ishlash bo‘limi boshlig‘i G.Xolmatova so‘z olib, shoir sheʼrlarining har bir satrida samimiylik, mehr-muhabbat aks etgani haqida so‘z yuritdi. Sheʼrlardagi o‘ziga xoslik eʼtirof etildi. Shoirning nafaqat sheʼriyati balki, yuksak insoniy fazilatlari bilan atrofdagi insonlarga, yoshlarga hurmati, mehrining cheksiz bo‘lganligi xotirlandi.
Tadbirning badiiy qismida O‘zbekiston Yoshlar ittifoqi institut boshlang‘ich tashkiloti faollari tomonidan Muhammad Yusufning vatanni tarannum etgan, sadoqat va fidoyilik aks etgan sheʼrlari mohirona ijro etildi. Shoir sheʼrlari asosida yaratilgan qo‘shiqlar kuylandi va ularga monand raqslar namoyish qilindi.
