O‘zbekistonda birinchi marta simulyasion ta’limni rivojlantirish mavzusiga bag‘ishlab o‘tkazilgan xalqaro onlayn ilmiy-amaliy konferensiya pediatriya, akusherlik-ginekologiya, xirurgiya, anesteziologiya-reanimatsiya, ichki kasalliklar yo‘nalishlarida ish olib bordi. Xalqaro onlayn ilmiy-amaliy konferensiyaga Andijon davlat tibbiyot instituti rektori, professor M.M.Madazimov raislik qildi, institut o‘quv ishlari bo‘yicha prorektori, professor A.Sh.Arziqulov va xalqaro aloqalar bo‘limi boshlig‘i, dotsent K.Z.Salaxiddinovlar boshqardilar.
“Klinik tibbiyotga simulyasion ta’lim integratsiyasi tajribalarining amaliy qo‘llanilishi” (“ОПЫТ ИНТЕГРАЦИИ СИМУЛЯЦИОННОГО ОБУЧЕНИЯ В КЛИНИЧЕСКУЮ МЕДИЦИНУ“) mavzusidagi xalqaro onlayn ilmiy-amaliy konferensiyada Germaniyaning Rostok Universiteti, Rossiya Federatsiyasining Dog‘iston tibbiyot universitet, Irlandiya qirolligi Xiruglar kollejining diplomdan keyingi xirurgik ta’lim departamenti, Ukrainaning Xarkov milliy tibbiyot universitet, Qirg‘iziston Respublikasi Oliy tibbiyot maktabi simulyasion markazi, Tashkent tibbiyot akademiyasi, Samarqand davlat tibbiyot institutidan professor-o‘qituvchilari va Andijon davlat tibbiyot instituti prorektorlari, dekanlari, kafedra mudirlari va professor-o‘qituvchilari onlayn tarzda ishtirok etishdi.
Xalqaro onlayn ilmiy-amaliy konferensiyani Andijon davlat tibbiyot instituti rektori, professor M.M.Madazimov ochib berar ekan barchaga samimiy hamkorlik uchun minnadorchilik bildirdi va konferensiya dasturi va ma’ruzachilar bilan tanishtirib o‘tdi. Shundan so‘ng Andijon davlat tibbiyot instituti tarixi, ta’lim sifatini oshirish, simulyasion markazning tashkil etilishi va faoliyati yuzasidan ma’ruza qildi.
Shundan so‘ng ma’ruzachilarga so‘z berildi. Yetuk mutaxassislar simulyasion texnologiyalar, simulyasion ta’lim jarayonida e’tibor qaratish zarur jihatlar, talabalarning amaliy ko‘nikmalarga ega bo‘lishlari uchun simulyasion markazlarda yaratilishi zarur chora-tadbirlar yuzasidan ma’ruzalar qilishdi.
Xalqaro onlayn ilmiy-amaliy konferensiya davomida tibbiyotda malakali mutaxassislar tayyorlash uchun xalqaro hamkorlik aloqalarini mustahkamlash, simulyasion ta’limni rivojlantirish borasidagi tajribalar yuzasidan fikr-mulohazlar, takliflar bildirildi.
“Klinik tibbiyotga simulyasion ta’lim integratsiyasi tajribalarining amaliy qo‘llanilishi” mavzusidagi xalqaro onlayn ilmiy-amaliy konferensiya o‘z ishini muvaffaqiyatli yakunladi.
ADTI axborot xizmati