Ma’lumki, O‘zbekiston Respublikasi Vazirlar Mahkamasining 605-sonli qarori bilan 2021-yil 1-maydan boshlab yotoqxona bilan qamrab olinmagan va o‘ziga, shu jumladan ota-onasi (qonuniy vakillari) ga tegishli bo‘lmagan uyda ijara huquqi asosida yashaydigan davlat oliy ta’lim muassasalari talabalarining 60 foiziga ular tomonidan to‘lanadigan oylik ijara to‘lovining 50 foizi O‘zbekiston Respublikasining davlat byudjetidan to‘lab berilmoqda.
Jumladan, Andijon davlat tibbiyot institutining 840 nafar talabalariga ham oylik ijara to‘lovining 50 foizi to‘lab berilmoqda. Ularning yashash sharoiti va yana ijara xonadonlariga jalb qilish masalalari yuzasidan komissiya hay’ati yig‘ilishi o‘tkazildi.
Unda Yoshlar masalalari va ma’naviy-ma’rifiy ishlar bo‘yicha birinchi prorektor S.Salohiddinov, Rektor maslahatchisi X.Zokirov, fakultetlar dekan o‘rinbosarlari va tyutorlar ishtirok etdilar. Yig‘ilishda dastlab, Talabalarni turar joy bilan ta’minlash ishlarini muvofiqlashtiruvchi bo‘lim boshlig‘i D.Matmusayev shu kungacha bo‘limda amalga oshirilgan ishlar hisobotini yig‘ilganlarga o‘qib eshittirdi. Shundan so‘ng, so‘z olganlar tomonidan mavjud kamchiliklarni bartaraf etish yuzasidan tegishli topshiriqlar berildi. Kelgusidagi amalga oshiriladigan ishlar rejasi belgilab olindi.
