Bugun, 19-fevral kuni Andijon davlat tibbiyot instituti rektori M.Madazimov joriy yilning 13-fevral kuni Prezident Shavkat Mirziyoyev raisligida olimpiya va paralimpiya harakatini yana-da rivojlantirish, ommaviy sportni yangi bosqichga olib chiqish hamda aholi jismoniy faolligini oshirish chora-tadbirlari yuzasidan videoselektor yig‘ilishi hamda 14-fevral kuni Davlatimiz rahbarining mamlakatimiz yoshlari bilan o‘tkazgan muloqotidan kelib chiqib, viloyat hokimi Sh.Abdurahmonovning belgilab bergan topshirig‘iga asosan Baliqchi, Oltinko‘l, Ulug‘nor, Bo‘ston hamda Asaka tumanlarida yashovchi bitiruvchi bosqich talabalari bilan uchrashib, muloqot o‘tkazdi. Unda prorektorlar, fakultetlar dekanlari va talabalar bandligini ta’minlash bo‘yicha mas’ullar ishtirok etdi.
Dastlab, Prezidentimizning yig‘ilish davomida yoshlarga bildirgan ishonchi, har bir tashabbus qo‘llab-quvvatlanayotgani, uchrashuv davomida aytib o‘tilgan yangiliklar borasida so‘z yuritildi. Institutning Talabalar turar joyida doimiy tarzda sport to‘garaklari va qator sport musobaqalari o‘tkazilib borilayotganligi, ularda ishtirok etish talabalarga bo‘sh vaqtlarini mazmunli o‘tkazishlari va salomatligi uchun ham foydali bo‘lishi haqida ma’lumotlar berildi.
- Tibbiyot xodimlarining o‘zlari sog‘lom turmush tarziga rioya qilishlari zarur, ana shundagini aholi salomatligini mustahkamlay oladi. Erta tongdan sport bilan shug‘ullaning, bo‘sh vaqtlaringizni mazmunli tashkil eting. Shundagina o‘z maqsadlaringizga oson va tez yeta olasiz,- dedi institut rektori.
Shuningdek, «Ma’muriy islohotlar doirasida ta’lim sohasida davlat boshqaruvi takomillashtirilishi munosabati bilan O’zbekiston Respublikasining ayrim qonun xujjatlariga o’zgartirish va qo’shimchalar kiritish to’g’risida»gi O’zbekiston Respublikasining Qonuni mazmun-mohiyati, unda ta’lim, ilm-fan, sport sohasiga doir berilgan topshiriqlarning amaldagi ijrosi borasida ham ma’lumotlar berildi.
Shuningdek, institut rektori har bir talabani, biznes loyihasi bilan tadbirkorlikni yo‘lga qo‘yishni istagan yoshlarni ham albatta, qo‘llab-quvvatlashini bildirdi.
Shundan so‘ng, institut rektori talabalarning bugungi kunda ishga joylashish ko‘rsatkichlari bilan tanishdi. Bugungi kunda talabalar sohani rivojlantirishda qanday yangiliklar ustida ishlayotganliklari, loyihalari haqida ma’lumotlarni tingladi. Mas’ullarga loyihalarni amalga oshirish bo‘yicha imkoniyatlarni o‘rganish borasida topshiriqlar berdi.
Ma’lumot o‘rnida, bugungi kun holatiga ko‘ra, Asaka tumanida yashovchi 88 nafar bitiruvchidan 49 nafari, Baliqchi tumanida yashovchi 57 nafar bitiruvchidan 33 nafari, Bo‘ston tumanida yashovchi 17 nafar bitiruvchidan 12 nafari, Oltinko‘l tumanida yashovchi 63 nafar bitiruvchidan 39 nafari, Ulug‘nor tumanida yashovchi 23 nafar bitiruvchidan 13 nafarining bandligi ta’minlangan.
Muloqot davomida talabalar ishga joylashish borasidagi savollariga mas’ullardan batafsil javob oldi.
