Andijon davlat tibbiyot institutida “Xotirlash” va “Qadrlash” tadbirlarini o‘tkazish an’anaga aylanib bormoqda.
2019- yil 15- fevral kuni tibbiyot fanlari doktori, professor Mirza Tolipovich Tolipovning xotirasiga bag‘ishlangan tadbir o‘tkazildi. “Xotirlash” tadbiri munosabati bilan institut ilmiy kengashlar zaliga barcha kafedralarning professor-o‘qituvchilari, Onkologiya va tibbiy radiologiya kafedrasi xodimlari, magistrlar, M.Tolipovning qarindoshlari, yaqinlari jamuljam bo‘ldilar.]
Tadbirni ADTI rektori, professor M.Madazimov ochib, ustoz M.Tolipovning hayot yo‘li, jumladan uning tibbiyot ilmiga qo‘shgan ulkan hissasi va ilmiy ishlari xususida gapirdi.
So‘ngra Onkologiya va tibbiy radiologiya kafedrasi mudiri D.Mamarasulova so‘zga chiqib, qadrli ustoz haqidagi xotiralari bilan o‘rtoqlashdi.
Gematologiya kafedrasi professori Q.Soliev so‘z olib, qadrdon hamkasbi, yaqin do‘sti Mirza Tolipovich bilan birga ishlagan davrlarini yodga oldi. U insonning go‘zal va yaxshi fazilatlar egasi ekanligini ta’kidladi. Shuningdek, ustozning namunali oilasi to‘g‘risida samimiy fikrlarini aytdi.
Ustozning oila a’zolaridan biri-jiyani M.Ahmadjonova ham M.Tolipovning oila a’zolariga va shogirdlariga mehribon, bag‘rikeng, qattiqqo‘l, vijdonan va halol mehnat qilgan mohir shifokor bo‘lganligini aytib o‘tdi.
Onkologiya va tibbiy radiologiya kafedrasi assistenti R.Islamov ham so‘zga chiqib, ustozning tajribali rentgenolog sifatida erishgan yutuqlari haqida gapirdi.
Tadbir davomida ustozni ulug‘lovchi qo‘shiq sadosi ostida videorolik hamda kafedra faoliyati bilan bog‘liq esdalik fotosuratlari namoyish qilindi.
“Xotirlash” tadbiri yakunida institut rektori M.Madazimov professor Mirza Tolipovning yaqinlariga xodimlar kasaba uyushmasi hamda institut jamoasi nomidan guldasta va esdalik sovg‘alarini topshirdi. Shuningdek, bu kabi ma’naviy-ma’rifiy tadbirlar davom etishini ta’kidlab, tashkilotchilarga minnatdorchilik bildirdi.
