Andijon davlat tibbiyot institutida “Sport kuni” doirasida keng ko‘lamli sport musobaqalari hamda sog‘lomlashtirish tadbirlari yuqori ruh va ko‘tarinki kayfiyat ostida tashkil etildi. Tadbirda institut rektori Madamin Madazimov boshchiligida prorektorlar, Stomatologiya fakulteti professor-o‘qituvchilari, xodimlari hamda talaba-yoshlar faol ishtirok etdi.

Mazkur tadbirning asosiy maqsadi — sog‘lom turmush tarzini keng targ‘ib qilish, jamoada hamjihatlik va do‘stona muhitni mustahkamlash, yoshlarni sport va jismoniy faollikka keng jalb etishdan iborat bo‘ldi.

Musobaqalar davomida ishtirokchilar sportning voleybol, basketbol, stol tennisi, shaxmat va shashka turlari bo‘yicha o‘zaro kuch sinashdilar. Shuningdek, trenajyor zallarida turli jismoniy mashqlar va sog‘lomlashtirish mashg‘ulotlari ham tashkil etilib, barcha qatnashchilarda katta qiziqish uyg‘otdi.

Bellashuvlar jarayonida ishtirokchilar yuqori kayfiyat, sportga bo‘lgan mehr va jamoaviy birdamlik namunalarini namoyon etdilar. Ayniqsa, professor-o‘qituvchilar hamda talabalar o‘rtasidagi sport uchrashuvlari tadbirga yanada iliq va samimiy ruh bag‘ishladi.

Shaxmat va shashka bahslarida ishtirokchilarning mantiqiy fikrlashi, strategik yondashuvi va ziyrakligi namoyon bo‘lgan bo‘lsa, voleybol hamda basketbol musobaqalarida jamoaviy hamkorlik, epchillik va chaqqonlik alohida e’tiborga sazovor bo‘ldi.

“Sport kuni” nafaqat sport musobaqasi, balki sog‘lom hayot tarzi, faol turmush va jamoaviy birdamlikni targ‘ib qiluvchi muhim tadbir sifatida barchada unutilmas taassurot qoldirdi.