Andijon davlat tibbiyot instituti xalqaro aloqalarni kengaytirish, ta'lim sifatini oshirish va xorijiy tajribani o'rganish maqsadida nufuzli xorijiy muassasalar bilan hamkorlikni faol davom ettirmoqda.

Kuni kecha Tibbiy radiologiya kafedrasi mudiri Z.Madumarova boshchiligidagi institut vakillari V.A.Almazov nomidagi nomidagi Milliy tibbiy tadqiqot markazi ko‘magida 406-gimnaziyada bo‘ldi. Uchrashuv samimiy, do‘stona va ko‘tarinki ruhda bo‘lib o‘tdi.

Tadbir doirasida institut vakillari mezbonlar uchun maxsus taqdimotlar o'tkazdi. Unda ona yurtimiz O‘zbekistonning madaniy merosi, shuningdek, institutning boy tarixi va bugungi kunda amalga oshirilayotgan yirik ta'lim va tibbiy loyihalar haqida batafsil ma'lumot berildi.

Ayniqsa, bitiruvchilarning o‘quv jarayonidagi o‘ziga xos xususiyatlari va zamonaviy ta'lim yondashuvlari haqidagi ma'lumotlar yig‘ilganlarda katta qiziqish uyg‘otdi.

Tadbirning eng esda qolarli lahzalaridan biri amaliy mashg‘ulotlar jarayoni bo‘ldi. Institut vakillari gimnaziyaning zamonaviy "Texnosfera" laboratoriyasida iqtidorli "Kurchatov to'garagi" ilmiy jamiyati talabalari bilan yelkama-yelka turib, qiziqarli amaliy jarayonlarda ishtirok etdi. Bu hamkorlik bilim, tajriba va ijobiy energiya almashinuviga aylandi.

Mezbonlar ushbu uchrashuvni kelgusidagi yirik xalqaro loyihalarga yo‘l ochuvchi tarixiy lahza sifatida e'tirof etishdi.

Andijon davlat tibbiyot instituti tibbiy ta'lim va ilm-fanni rivojlantirish yo‘lidagi bu kabi samarali xalqaro uchrashuvlarni kelgusida ham davom ettiradi.