Andijon davlat tibbiyot instituti mutaxassislari tomonidan Ulug‘nor tumani 40-Oilaviy poliklinikasida navbatdagi tibbiy ko‘rik va profilaktik tadbir tashkil etildi. Tadbir davomida 250 nafardan ortiq aholi vakillari malakali tibbiy ko‘rikdan o‘tkazildi.
Ko‘rik jarayonida 17 nafar turli yo‘nalishdagi mutaxassis shifokorlar ishtirok etib, fuqarolarga tibbiy maslahatlar va zarur tavsiyalar berdilar. Shuningdek, zamonaviy diagnostik tekshiruvlar amalga oshirilib, 75 nafar fuqaroda ultratovush tekshiruvi (UTT) hamda 68 nafar fuqaroda elektrokardiografiya (EKG) tekshiruvlari o‘tkazildi.
Sog‘lig‘i sababli tibbiyot muassasasiga kelish imkoniyati bo‘lmagan 2 nafar bemor yashash manzilida ko‘rikdan o‘tkazildi va ularga zarur tibbiy yordam ko‘rsatildi.
Ko‘rik natijalariga ko‘ra, qo‘shimcha davolanish va chuqurlashtirilgan tekshiruvga muhtoj bo‘lgan 6 nafar bemorga viloyat tibbiyot muassasalariga, 5 nafar bemorga esa tuman tibbiyot birlashmasiga sog‘lig‘ini tiklash va yaxshilash maqsadida bepul yo‘llanmalar berildi.
Bundan tashqari, ambulator davolanish tavsiya etilgan bemorlarga davlatimiz tomonidan ajratilgan bepul dori vositalari tarqatildi hamda ularni qabul qilish tartibi bo‘yicha tushuntirishlar berildi.
Tadbir davomida mutaxassislar tomonidan sog‘lom turmush tarziga rioya qilish, to‘g‘ri ovqatlanish, zararli odatlardan voz kechish va muntazam jismoniy faollikning inson salomatligini mustahkamlashdagi ahamiyati haqida keng qamrovli targ‘ibot-tushuntirish ishlari olib borildi. Fuqarolar o‘zlarini qiziqtirgan savollarga mutaxassislar tomonidan batafsil javob oldi.
