1-iyun — Xalqaro bolalarni himoya qilish kuni munosabati bilan "Bor mehrimiz senga, bolajon" shiori ostida donorlik aksiyasi tashkil etildi. 

Ushbu ezgu tashabbusning asosiy maqsadi jamiyatda mehr-oqibat, insonparvarlik va saxovat kabi yuksak qadriyatlarni targ‘ib qilish, shuningdek, muhtoj insonlarga yordam qo‘lini cho‘zish orqali hayotga umid ulashishdan iborat bo‘ldi.

Aksiyada talabalar ixtiyoriy ravishda faol ishtirok etib, donorlikning inson hayotini saqlab qolishdagi beqiyos ahamiyatini yana bir bor namoyon etdilar. Har bir topshirilgan qon — kimningdir hayotini saqlab qolishi, sog‘lig‘ini tiklashi yoki yangi umid baxsh etishi mumkinligi ushbu tadbirning mazmun-mohiyatini yanada yuksaltirdi.

Donorlik nafaqat inson salomatligi uchun, balki jamiyatda o‘zaro mehr, birdamlik va mas’uliyat hissini mustahkamlovchi ezgu amal hisoblanadi. Talabalarning ushbu xayrli tashabbusdagi ishtiroki ularning yuksak fuqarolik pozitsiyasi, insonparvarlik fazilatlari va jamiyat oldidagi mas’uliyatini yaqqol namoyon etdi.

Mazkur aksiya orqali bolajonlar bayrami arafasida ezgulik va mehr-muruvvat g‘oyalari keng targ‘ib qilinib, inson hayotini qadrlash va yaxshilik ulashish har birimizning sharafli burchimiz ekanligi yana bir bor e’tirof etildi.