Bugun Andijon davlat tibbiyot institutida "Talaba-qizlar va ota-onalar" forumi yuqori saviyada tashkil etildi.

Forum doirasida institutda faoliyat boshlagan "Qizlar tashabbuslari va maslahat markazi" mehmonlar, ota-onalar hamda talaba-yoshlarga tanishtirildi.

Mazkur markaz talaba-qizlarning ijtimoiy faolligini oshirish, ularning g‘oya va tashabbuslarini qo‘llab-quvvatlash, ta’lim va kasbiy rivojlanish yo‘nalishlarida amaliy maslahatlar berishga xizmat qiladi.

Taqdimot davomida markazda iqtidorli va tashabbuskor qizlarning loyihalari hamda takliflari tinglanishi, ularni amalga oshirish bo‘yicha zarur tavsiyalar va ko‘maklar berilishi mumkinligi alohida ta’kidlandi. Shuningdek, talaba-qizlarning liderlik salohiyatini rivojlantirish, ularni innovatsion g‘oyalar va istiqbolli tashabbuslarga jalb etish markaz faoliyatining ustuvor yo‘nalishlaridan biri ekani qayd etildi.

Forum ishtirokchilari tomonidan talaba-qizlar uchun yaratilayotgan imkoniyatlar, ularning bilim va salohiyatini ro‘yobga chiqarishga qaratilgan bunday tashabbuslar yuksak e’tirof etildi.