Andijon davlat tibbiyot institutida talaba-qizlar va ota-onalar forumi tashkil etildi.
Forum doirasida Andijon davlat tibbiyot instituti rektori Madamin Madazimov so‘zga chiqib, mamlakatimizda xotin-qizlarni har tomonlama qo‘llab-quvvatlash, ularning sifatli ta’lim olishi va kasbiy rivojlanishi uchun yaratilayotgan keng imkoniyatlar haqida batafsil to‘xtalib o‘tdi.
Ta’kidlanganidek, bugungi kunda yurtimizda xotin-qizlarning oliy ta’lim bilan qamrovini oshirish, ilmiy salohiyatini yuksaltirish va ijtimoiy faolligini kuchaytirishga qaratilgan keng ko‘lamli islohotlar amalga oshirilmoqda. Jumladan, oliy ta’lim muassasalariga kirishda ajratilayotgan qo‘shimcha davlat grantlari va kvotalar, turli nomdagi stipendiyalar, ilmiy loyihalarda ishtirok etish imkoniyatlari hamda ta’lim olish uchun berilayotgan imtiyozli kreditlar yosh qizlarning bilim olishiga katta rag‘bat bo‘lib xizmat qilayotgani alohida qayd etildi.
Rektor, shuningdek, Andijon davlat tibbiyot institutida talaba-qizlarning bilim olishi, ilmiy izlanishlar bilan shug‘ullanishi, xorijiy tillarni o‘rganishi hamda o‘z iqtidorini namoyon etishi uchun barcha zarur sharoitlar yaratilganini ta’kidladi. Ota-onalarni farzandlarining ta’lim-tarbiyasida institut bilan yaqin hamkorlik qilishga chaqirib, bugungi yoshlar mamlakatimizning ertangi taraqqiyotini belgilovchi asosiy kuch ekanligini alohida e’tirof etdi.
Tadbir davomida institut rektorining xotin-qizlar masalalari bo‘yicha maslahatchisi G.Xolmatova ham so‘zga chiqib, oliygohda talaba-qizlarni qo‘llab-quvvatlash, ularning muammolarini o‘rganish va ijtimoiy himoyasini ta’minlash borasida amalga oshirilayotgan ishlar haqida ma’lumot berdi.
U o‘z nutqida talaba-qizlarning ta’lim olishi, bo‘sh vaqtlarini mazmunli tashkil etishi, sport va madaniy-ma’rifiy tadbirlarda faol qatnashishi, ilmiy-tadqiqot faoliyatiga jalb etilishi uchun yaratilgan imkoniyatlarga to‘xtalib o‘tdi. Shuningdek, iqtidorli va tashabbuskor qizlarni qo‘llab-quvvatlash, ularning liderlik salohiyatini rivojlantirish, turli tanlov va grant dasturlarida ishtirok etishiga ko‘maklashish bo‘yicha olib borilayotgan tizimli ishlar haqida ham batafsil ma’lumot berdi.
