Andijon davlat tibbiyot instituti professor-o‘qituvchilarining xalqaro ilmiy-akademik hamkorlikni rivojlantirish borasidagi faoliyati izchil davom etmoqda.

Ayni kunlarda institutning Travmatologiya va neyroxirurgiya kafedrasi mudiri, professor K.Xudayberdiyev hamda Vrachlar malakasini oshirish va qayta tayyorlash fakulteti Umumiy xirurgiya, endoxirurgiya, anesteziologiya va reanimatologiya kafedrasi mudiri, professor G.Xodjimatov Kuban davlat tibbiyot universitetida tashkil etilgan malaka oshirish dasturida ishtirok etmoqda.

Malaka oshirish dasturi doirasida professorlar universitetning 4-bosqich talabalari uchun fakultet xirurgiyasi va travmatologiya fanlaridan ma’ruzalar o‘qib, o‘zlarining ko‘p yillik ilmiy, pedagogik hamda amaliy tajribalari bilan o‘rtoqlashmoqdalar. Mashg‘ulotlar davomida zamonaviy diagnostika va davolash usullari, murakkab klinik holatlar tahlili hamda tibbiyot sohasidagi ilg‘or yondashuvlar yuzasidan qimmatli bilim va tavsiyalar berilmoqda.

Mazkur akademik almashinuv nafaqat professorlarning kasbiy mahoratini yanada oshirishga, balki ikki oliy ta’lim muassasasi o‘rtasidagi ilmiy-tadqiqot, ta’lim va innovatsion hamkorlik aloqalarini mustahkamlashga ham xizmat qilmoqda. Shuningdek, bu kabi xalqaro tajriba almashuvlari tibbiy ta’lim sifatini oshirish, ilg‘or xorijiy tajribalarni o‘quv jarayoniga tatbiq etish hamda zamonaviy tibbiyot rivojiga munosib hissa qo‘shish uchun muhim ahamiyat kasb etadi.