Bugun Andijon davlat tibbiyot institutida magistratura va bakalavriat bosqichi bitiruvchilarining tantanali bitiruv oqshomi yuqori kayfiyat va ko‘tarinki ruhda bo‘lib o‘tdi.

Tadbirda Andijon viloyati hokimi Shuhratbek Abdurahmonov ishtirok etib,

bitiruvchilarni samimiy muborakbod etdi hamda ularga sharafli kasbiy faoliyatlarida ulkan muvaffaqiyatlar tiladi.

Shuningdek, institut rektori Madamin Madazimov bitiruvchilarni hayotlaridagi muhim bosqichni muvaffaqiyatli yakunlaganlari bilan tabriklab, ularning mamlakatimiz tibbiyoti ravnaqiga munosib hissa qo‘shishiga ishonch bildirdi.

Tadbirning eng hayajonli lahzalaridan biri bitiruvchilarning shifokorlik qasamyodini qabul qilishi bo‘ldi. Yosh mutaxassislar kasbga sadoqat, inson salomatligini asrash va tibbiyot odob-axloq me’yorlariga sodiq qolishga tantanali qasamyod qildi.

Marosim davomida o‘qish va jamoat ishlarida alohida faollik ko‘rsatgan bitiruvchilar hamda ularning ota-onalari tashakkurnomalar bilan taqdirlandi.
Bitiruvchilar va ota-onalar nomidan so‘zga chiqqanlar institut jamoasiga, ustozlarga hamda yaratilgan sharoitlar uchun samimiy minnatdorlik izhor etdi.

Bayram dasturi davomida kuy-qo‘shiqlar, milliy va zamonaviy raqslar ijro etilib, tantanaga o‘zgacha shukuh va ko‘tarinki kayfiyat bag‘ishlandi.

Ma’lumot uchun: joriy yilda Andijon davlat tibbiyot institutini jami 1792 nafar talaba tamomladi. Shundan 90 nafari magistrant, 81 nafari xorijlik talaba, 8 nafari esa Dog‘iston davlat tibbiyot instituti bilan qo‘shma ta’lim dasturi asosida tahsil olgan bitiruvchilardir.

Bitiruv oqshomi yosh shifokorlarga oq yo‘l tilash, ularning kelgusi faoliyatiga ulkan ishonch va ezgu tilaklar bildirish ruhida yakunlandi.