Bugun, 3-iyul kuni, Andijon davlat tibbiyot instituti rektori M.Madazimov Oltinko‘l tumanida dual ta'lim tizimi asosida tahsil olib, amaliyot o‘tayotgan 70 nafar talabalar bilan uchrashuv o‘tkazdi.

Uchrashuv davomida talabalar uchun yaratilgan amaliy ta’lim sharoitlari, kasbiy ko‘nikmalarni shakllantirish jarayoni hamda dual ta’lim tizimining afzalliklari yuzasidan fikr almashildi. Rektor talabalar bilan samimiy muloqot qilib, ularning amaliyot jarayonidagi taassurotlari, duch kelayotgan masalalari va takliflarini tingladi.

Shuningdek, amaliyotning sifatli tashkil etilishi, nazariy bilimlarni amaliyot bilan uyg‘unlashtirish hamda kelgusida malakali va raqobatbardosh tibbiyot mutaxassislarini tayyorlash borasidagi ustuvor vazifalar muhokama qilindi.

Talabalar dual ta'lim tizimi orqali malakali shifokorlar va tibbiyot xodimlari rahbarligida bevosita amaliy tajriba orttirayotganliklari, bu esa ularning kasbiy mahoratini oshirishda muhim o‘rin tutayotganini alohida ta'kidladi.

Mazkur uchrashuv ta'lim sifati va amaliyot samaradorligini yanada oshirish, talabalar bilan ochiq muloqotni mustahkamlash hamda dual ta'lim tizimini izchil rivojlantirish yo‘lidagi muhim qadamlardan biri bo‘ldi. Shuningdek, talabalarning amaliyot jarayonlari nazoratdan o'tkazildi.