Ayni kunlarda Belarus Respublikasida xizmat safarida bo‘lib turgan Andijon davlat tibbiyot instituti rektori M.Madazimov qator rasmiy uchrashuvlar va hamkorlik muzokaralarida ishtirok etmoqda.

Xizmat safari doirasida institut tomonidan Vitebsk davlat tibbiyot universiteti, Vitebsk davlat universiteti hamda Vitebsk davlat veterinariya tibbiyot akademiyasi bilan istiqbolli hamkorlikni rivojlantirishga qaratilgan hujjatlar, jumladan, “Yo‘l xaritasi” va hamkorlik shartnomalari imzolandi.

Mazkur kelishuvlar ta’lim va ilmiy-tadqiqot sohalarida o‘zaro tajriba almashish, professor-o‘qituvchilar hamda talabalar akademik almashinuvini yo‘lga qo‘yish, qo‘shma ilmiy va innovatsion loyihalarni amalga oshirish, xalqaro hamkorlikni yanada kengaytirishga xizmat qiladi.

Muzokaralar davomida IT va tibbiyot yo‘nalishlarini integratsiyalash, raqamli sog‘liqni saqlash, sun’iy intellekt texnologiyalarini tibbiyot amaliyotiga joriy etish, tibbiy axborot tizimlarini rivojlantirish, shuningdek, biotexnologiya va parazitologiya yo‘nalishlarida ilmiy hamkorlikni yo‘lga qo‘yish, zamonaviy laboratoriya tajribalarini almashish hamda ushbu yo‘nalishlarda qo‘shma ta’lim va ilmiy dasturlarni amalga oshirish masalalari yuzasidan o‘zaro kelishuvlarga erishildi.