Andijon davlat tibbiyot instituti professor-o‘qituvchilari, tyutorlari hamda talabalari Janubiy Koreyaning Daegu Haany  universitetida tashkil etilgan yozgi amaliyot va stajirovka dasturida ishtirok etishni boshladi.

Mazkur xalqaro dastur institutning xorijiy oliy ta’lim muassasalari bilan hamkorligini yanada mustahkamlash, ta’lim sifati va ilmiy salohiyatni oshirish, shuningdek, ishtirokchilarning zamonaviy tibbiyot sohasidagi bilim va amaliy ko‘nikmalarini rivojlantirishga qaratilgan.

Dastur davomida ishtirokchilar malakali mutaxassislar tomonidan o‘tkazilayotgan ma’ruzalar, amaliy mashg‘ulotlar, laboratoriya ishlari, klinik kuzatuvlar hamda tajriba almashish jarayonlarida faol qatnashmoqda. Shu bilan birga, ular Janubiy Koreya tibbiyot ta’limi tizimi, ilg‘or pedagogik yondashuvlar va innovatsion tibbiy texnologiyalar bilan yaqindan tanishish imkoniyatiga ega bo‘lmoqda.

Yozgi amaliyot va stajirovka dasturi xalqaro akademik hamkorlikni kengaytirish, tajriba almashish, yosh mutaxassislarning kasbiy kompetensiyalarini rivojlantirish hamda Andijon davlat tibbiyot institutining xalqaro maydondagi nufuzini yanada mustahkamlashga xizmat qiladi.