Andijon davlat tibbiyot institutining 12 nafar malakali mutaxassisi Andijon teleradiokanali jamoasi uchun keng qamrovli profilaktik tibbiy ko‘rik tashkil etdi. Unda teleradiokanalning 72 nafar xodimi chuqurlashtirilgan tibbiy ko‘rikdan o‘tkazildi.

Ko‘rik davomida terapevt, kardiolog va boshqa mutaxassislar tomonidan xodimlarning umumiy salomatlik holati baholandi. Shuningdek, zamonaviy diagnostika usullari asosida ultratovush tekshiruvi (UZI), elektrokardiografiya (EKG) hamda laborator tahlillar o‘tkazildi. Tekshiruvlar natijasida xodimlarning sog‘lig‘i yuzasidan zarur tavsiyalar berilib, aniqlangan ayrim holatlar bo‘yicha qo‘shimcha davolanish va chuqurlashtirilgan tekshiruvlardan o‘tish tavsiya etildi.

Mazkur tibbiy ko‘rikning asosiy maqsadi xodimlar salomatligini mustahkamlash, kasalliklarni erta aniqlash hamda ularning oldini olishga qaratilgan bo‘lib, bunday profilaktik tadbirlar sog‘lom mehnat muhitini yaratish va aholiga sifatli xizmat ko‘rsatishda muhim ahamiyat kasb etadi.