Andijon davlat tibbiyot instituti rektori Madamin Madazimov foydalanishga topshirilishi arafasida bo‘lgan institut klinikasida amalga oshirilayotgan ishlar bilan yana bir bor yaqindan tanishdi.

Tashrif davomida rektor klinikaning mavjud infratuzilmasi, bo‘lim va xonalarining jihozlanish holati, tibbiy xizmat ko‘rsatish uchun yaratilayotgan sharoitlar hamda klinikani zamonaviy talablar asosida faoliyat yuritishga tayyorlash jarayonlarini ko‘zdan kechirdi.

Shuningdek, klinika rahbari bilan uchrashuv o‘tkazilib, muassasaning kelgusidagi faoliyat yo‘nalishlari, tibbiy xizmatlar sifatini yanada oshirish, zamonaviy diagnostika va davolash usullarini amaliyotga joriy etish masalalari yuzasidan fikr almashildi.

Muloqot davomida klinikaning Andijon davlat tibbiyot instituti uchun nafaqat aholiga yuqori malakali tibbiy xizmat ko‘rsatadigan zamonaviy davolash maskani, balki tibbiy ta’lim va amaliyotni uyg‘unlashtiruvchi muhim klinik baza sifatidagi ahamiyatiga alohida e’tibor qaratildi.

Institut talabalari, magistrlari, klinik ordinatorlari va professor-o‘qituvchilarining amaliy mashg‘ulotlarini sifatli tashkil etish, bo‘lajak shifokorlarning nazariy bilimlarini amaliy ko‘nikmalar bilan mustahkamlash uchun zarur sharoitlarni yaratish masalalari ham muhokama qilindi.

Shu bilan birga, klinikada zamonaviy tibbiy texnologiyalardan samarali foydalanish, malakali mutaxassislarni jalb etish, tibbiy xizmat ko‘rsatish madaniyati va sifatini yuqori darajaga olib chiqish bo‘yicha amalga oshirilayotgan ishlar tahlil qilindi.