Andijon davlat tibbiyot institutida 1-bosqich talabalari uchun institut rektori M.Madazimov tomonidan “Yagona Vatan, yagona xalq bo‘lib, yangi hayot va kelajak yaratamiz!” shiori ostida “Mustaqillik darslari” tashkil etildi.

Mazkur dars nafaqat mustaqillikning tarixiy ahamiyatini anglash, balki bugungi tinch va osoyishta hayotimizning qadriga yetish, Vatan taqdiriga daxldorlik hissini yanada mustahkamlashga xizmat qildi.

Dars davomida O‘zbekistonning mustaqillik yillarida bosib o‘tgan murakkab va sharafli taraqqiyot yo‘li, qo‘lga kiritilgan ulkan yutuqlar, jamiyat hayotining turli jabhalarida amalga oshirilgan keng ko‘lamli islohotlar haqida atroflicha fikr yuritildi.

Ayniqsa, bugungi kunda mamlakatimizda amalga oshirilayotgan bunyodkorlik va yangilanishlar, yoshlar uchun yaratilayotgan keng imkoniyatlar, zamonaviy ta’lim, ilm-fan va innovatsiyalarni rivojlantirishga qaratilayotgan e’tibor alohida ta’kidlandi.

Tibbiyot sohasida yosh mutaxassislarni tayyorlash, ularning chuqur bilim olishi, zamonaviy kasbiy ko‘nikmalarni egallashi va kelajakda xalq salomatligi yo‘lida fidokorona xizmat qilishi uchun yaratilayotgan shart-sharoitlar haqida ham so‘z bordi.

Dars davomida mavzuga oid videoroliklar namoyish etildi.