“Sentabr — giyohvandlikka qarshi kurashish” oyligi doirasida Andijon davlat tibbiyot institutida talaba-yoshlar o‘rtasida psixoaktiv moddalarning inson organizmi va ruhiy salomatligiga salbiy ta’sirini keng tushuntirishga qaratilgan davra suhbati tashkil etildi.

TadbirdaAndijon davlat tibbiyot instituti rektori M. Madazimov, Yoshlar masalalari va ma’naviy-ma’rifiy ishlar bo‘yicha birinchi prorektor G.Xolmatova, Maxsus ishchi guruhning yetakchi mutaxassisi A.Maxmudov, Viloyat narkologiya dispanseri direktor oʻrinbosari I.Xudirov hamda talaba-yoshlar ishtirok etdi.

Davra suhbatida psixoaktiv moddalarning inson organizmiga ta’siri, ularni iste’mol qilish natijasida yuzaga kelishi mumkin bo‘lgan jismoniy va ruhiy o‘zgarishlar, shuningdek, qaramlikning inson hayoti va jamiyat uchun salbiy oqibatlari haqida atroflicha fikr yuritildi.

Tadbir davomida so‘z olganlar mavzu yuzasidan o‘z fikr-mulohazalarini bildirib, ayniqsa, yoshlar orasida sog‘lom turmush tarzini shakllantirish, zararli odatlarga nisbatan murosasiz munosabatni qaror toptirish hamda psixoaktiv moddalarning xavfli oqibatlaridan ogoh bo‘lish muhimligini ta’kidladi.

Shuningdek, giyohvandlik va psixoaktiv moddalarga qaramlikning oldini olishda tibbiy savodxonlik, to‘g‘ri tarbiya, sog‘lom ijtimoiy muhit va yoshlarning bo‘sh vaqtini mazmunli tashkil etish muhim omil ekani qayd etildi.

Tadbir davomida talabalar o‘zlarini qiziqtirgan savollar bilan murojaat qilib, mutaxassislardan mavzu yuzasidan kerakli ma’lumot va tavsiyalar oldi.