Andijon davlat tibbiyot instituti rektori M.Madazimov rahbarligida aholi o‘rtasida sog‘lom turmush tarzini keng targ‘ib qilish masalalariga bag‘ishlangan yig‘ilish o‘tkazildi.
Unda davolash (amaliyot) ishlari bo‘yicha prorektor B.Mirzakarimov, fakultet dekanlari, kafedra mudirlari va mas’ul professor-o‘qituvchilar ishtirok etdi.
Yig‘ilishda viloyatning chekka hududlarigacha kirib borib, aholiga sog‘lom turmush tarziga rioya qilish, to‘g‘ri ovqatlanish, jismoniy faollikni oshirish, zararli odatlardan voz kechish hamda profilaktik tibbiy ko‘riklarda muntazam ishtirok etishning ahamiyatini tushuntirish bo‘yicha vazifalar belgilandi.
Biriktirilgan hududlarda kafedra professor-o‘qituvchilari, talabalar va volontyor yoshlar ishtirokida targ‘ibot tadbirlarini muntazam tashkil etish, aholiga mavzuga oid tavsiyalar berish hamda targ‘ibot materiallarini tarqatish zarurligi ta’kidlandi.
Shuningdek, yig‘ilishda institut bitiruvchilarining bandligini ta’minlash masalasi ham muhokama qilindi. Bitiruvchilarni mutaxassisligi bo‘yicha ishga joylashtirishga ko‘maklashish, tibbiyot muassasalari bilan hamkorlikni kuchaytirish va mavjud bo‘sh ish o‘rinlari haqida ma’lumot berib borish bo‘yicha mas’ullarga tegishli topshiriqlar berildi.
Yig‘ilish yakunida belgilangan vazifalarni sifatli va o‘z vaqtida amalga oshirish yuzasidan tegishli ko‘rsatmalar berildi.
