Andijon davlat tibbiyot institutida “Urologik kasalliklarni davolashda innovatsion yondashuv” mavzusida xalqaro ilmiy-amaliy anjuman bo‘lib o‘tdi.

Unda O‘zbekistonning turli hududlaridan, shuningdek, Rossiya, Qirg‘iziston, Germaniya, Pokiston va Boshqirdistondan 50 nafardan ortiq yetakchi olimlar hamda malakali tibbiyot mutaxassislari ishtirok etdi.

Anjumanning ochilish marosimida institut rektori Madamin Madazimov nomidan Ilmiy ishlar va innovatsiyalar bo‘yicha prorektor K.Salohiddinov kirish so‘zi bilan qatnashdi.

Tadbir davomida urologiya sohasidagi zamonaviy ilmiy yutuqlar, kasalliklarni erta aniqlash, innovatsion diagnostika va davolash usullari, ilg‘or tibbiy texnologiyalar hamda xalqaro tajribani amaliyotga tatbiq etish masalalari muhokama qilindi. Mutaxassislar tibbiy xizmat sifatini oshirish, ilm-fan va amaliyot integratsiyasini mustahkamlash hamda xalqaro ilmiy hamkorlikni kengaytirish yuzasidan fikr va tajriba almashdilar.

Xalqaro anjuman doirasida Andijon davlat tibbiyot instituti vakillarini taqdirlash marosimi ham bo‘lib o‘tdi. Institut rektori Madamin Madazimov O‘zbekiston Respublikasi Maxpirat nomidagi O‘rta Osiyo xalqlari tarixi instituti hamda Turon fanlar akademiyasi tomonidan ta’sis etilgan “Buyuk xizmatlari uchun” ko‘krak nishoni bilan taqdirlandi. Mukofotni rektor nomidan prorektor K. Salohiddinov qabul qilib oldi. Shuningdek, institut vakili Ulug‘bek Rustamovga Turon fanlar akademigi unvoni berildi. O. Hakkenberg hamda institut vakili Dilfuza Sadikova esa “Scientific Academy” ilm-ma’rifat markazi tomonidan “Ta’lim sohasidagi fidoyi xizmatlari uchun” xalqaro esdalik ko‘krak nishoni bilan taqdirlandi.

Mazkur anjuman urologiya sohasidagi ilg‘or tajribalarni ommalashtirish, ilmiy izlanishlar va klinik amaliyot o‘rtasidagi hamkorlikni rivojlantirish, shuningdek, mahalliy va xorijiy mutaxassislar o‘rtasida ilmiy aloqalarni mustahkamlashga xizmat qildi.