Andijon davlat tibbiyot institutida Yoshlar kuni munosabati bilan institut rektori M. Madazimovning talabalar bilan uchrashuvi bo‘lib o‘tdi.

Uchrashuv davomida ta’lim va tibbiyot sohasidagi yangiliklar, talabalarning sifatli ta’lim olishi uchun yaratilgan shart-sharoitlar, iqtidorli yoshlarni qo‘llab-quvvatlash, bo‘sh vaqtlarini mazmunli tashkil etish hamda bitiruvchilar bandligini ta’minlash borasida amalga oshirilayotgan ishlar muhokama qilindi.

“Bugungi kunda yoshlarimizning sifatli ta’lim olishi, zamonaviy bilim va ko‘nikmalarni egallashi hamda kelgusida malakali tibbiyot mutaxassislari bo‘lib yetishishi uchun barcha zarur shart-sharoitlarni yaratish ustuvor vazifalarimizdan biridir. Ayniqsa, iqtidorli talabalarni qo‘llab-quvvatlash, ularning ilmiy salohiyati va tashabbuslarini rag‘batlantirish, bo‘sh vaqtlarini mazmunli tashkil etish hamda bitiruvchilar bandligini ta’minlashga alohida e’tibor qaratmoqdamiz. Zero, bugungi talaba — ertangi kunning malakali shifokori, xalq salomatligi uchun mas’ul mutaxassisidir”, — dedi institut rektori M. Madazimov.

Uchrashuv davomida talabalar ham o‘z fikr-mulohazalari, taklif va tashabbuslarini bildirdilar. Yoshlar tomonidan ilgari surilgan fikrlar yuzasidan o‘zaro muloqot qilinib, talabalarni qiziqtirgan masalalar muhokama etildi.

Mazkur uchrashuv institut rahbariyati va talabalar o‘rtasidagi ochiq muloqotni mustahkamlash, yoshlarning tashabbuslarini qo‘llab-quvvatlash hamda ta’lim sifatini yanada oshirish yo‘lidagi muhim qadamlardan biri bo‘ldi.