Andijon davlat tibbiyot institutida muhim xalqaro uchrashuv bo‘lib o‘tdi. Unda Hindiston Respublikasining Elchisi Smita Pant xonim tashrif buyurib, institutda tahsil olayotgan xorijlik, xususan hindistonlik talabalar uchun yaratilgan sharoitlar bilan yaqindan tanishdi.
Mehmonlarni institut rektori M.Madazimov hamda Xalqaro aloqalar bo‘yicha prorektor F.Rasulov samimiy ruhda kutib oldilar. Tashrif davomida delegatsiya dastlab institut klinikasiga tashrif buyurib, u yerda talabalarning amaliy bilimlarini mustahkamlash uchun yaratilgan zamonaviy sharoitlar, davolash jarayonlari hamda klinik bazaning imkoniyatlari bilan tanishdi.
Shundan so‘ng mehmonlar yangi bunyod etilgan 2000 o‘rinli o‘quv binosida bo‘lib, undagi zamonaviy auditoriyalar, texnik jihozlar va ta’lim muhiti bilan yaqindan tanishdilar. Ayniqsa, Simulyatsiya va attestatsiya markazida tashkil etilgan o‘quv va amaliyot jarayonlari katta qiziqish uyg‘otdi. Mazkur markaz talabalarga real klinik holatlarga yaqin sharoitda bilim va ko‘nikmalarni shakllantirish imkonini berayotgani alohida e’tirof etildi.
Tashrif doirasida tomonlar o‘rtasida samarali muzokaralar ham bo‘lib o‘tdi. Unda xorijlik talabalar uchun yanada qulay sharoitlar yaratish, ularning ta’lim sifati va yashash darajasini oshirish masalalari muhokama qilindi. Xususan, kutubxona fondini zamonaviy va xorijiy adabiyotlar bilan boyitish, talabalar turar joylarida yashash sharoitlarini yanada yaxshilash, shuningdek, talabalarning bo‘sh vaqtlarini mazmunli tashkil etish bo‘yicha taklif va fikrlar almashildi.
Mazkur uchrashuv o‘zaro hamkorlikni yanada mustahkamlash, xalqaro ta’lim aloqalarini kengaytirish hamda Andijon davlat tibbiyot institutining xorijiy talabalar uchun jozibadorligini oshirish yo‘lida muhim qadam bo‘ldi.
