Andijon davlat tibbiyot instituti rektori M.Madazimov tomonidan xususiy klinikalardagi o‘quv bazalarini o‘rganish ishlari izchil davom ettirilmoqda. Bu kabi uchrashuvlar talabalarning amaliy bilim va ko‘nikmalarini mustahkamlash, ularni zamonaviy tibbiyot talablariga mos ravishda tayyorlashda muhim ahamiyat kasb etadi.
“Yoshlar kuni” doirasida rektor “Mubinaxon shifo” klinikasida bo'lib, Davolash fakultetining 4–5-bosqich talabalari bilan ochiq va samimiy muloqot o‘tkazdi.
Uchrashuv davomida klinik amaliyot jarayonlari, o‘quv bazalarida yaratilgan shart-sharoitlar, mashg‘ulotlar sifati hamda talabalarning amaliy ko‘nikmalarini oshirish masalalari muhokama qilindi. Talabalar o‘z fikr va takliflarini bildirish imkoniga ega bo‘ldi.
Rektor o‘z nutqida bilimlarni puxta egallash, amaliyotdan unumli foydalanish hamda kasbiy mahoratni oshirish zarurligini alohida ta’kidladi. Shuningdek, zamonaviy tibbiy yondashuvlarni o‘zlashtirishda faol bo‘lish muhimligi qayd etildi.
Mazkur uchrashuv talabalarning kasbiy shakllanishi, amaliy tayyorgarligini yanada kuchaytirish hamda kelajakda yetuk mutaxassis bo‘lib yetishishlariga xizmat qiladi.
