Mamlakatimizda Davlatimiz rahbari tashabbusi bilan aholi o‘rtasida sog‘lom turmush tarzini keng targ‘ib qilish, ommaviy sportni rivojlantirish hamda jismoniy faollikni oshirishga qaratilgan kompleks chora-tadbirlar amalga oshirilmoqda.

Bugun, 10-aprel kuni Andijon viloyatida davlat oliy ta’lim muassasalari rahbarlari boshchiligida sport klublari tashabbusi bilan talabalar o‘rtasida sport musobaqalarini yanada rivojlantirish maqsadida “Andijon talabalari ligasi”ni tashkil etish hamda uni yuqori saviyada o‘tkazish masalalariga bag‘ishlangan uchrashuv bo‘lib o‘tdi.

Dastlab, oliy ta’lim muassasalari rektorlari tomonidan uchrashuvning asosiy maqsadi, yaqin kunlarda talabalar o‘rtasida o‘tkazilishi rejalashtirilgan sport musobaqalari hamda ulardan kutilayotgan natijalar yuzasidan batafsil ma’lumotlar berildi.

Uchrashuv davomida nufuzli musobaqalarni yuqori saviyada tashkil etish va ularni samarali o‘tkazishga doir tashkiliy masalalar yuzasidan ishlab chiqilgan rejalar taqdim etildi. Mazkur masalalar ishtirokchilar tomonidan atroflicha muhokama qilinib, kelgusidagi ustuvor vazifalar hamda aniq chora-tadbirlar belgilab olindi.

Shundan so‘ng, liga musobaqalarini munosib va yuqori saviyada o‘tkazish, belgilangan nizom talablarini to‘liq ta’minlash hamda o‘zaro hamkorlikni yanada mustahkamlash maqsadida barcha oliy ta’lim muassasalari rektorlari tomonidan hamkorlik memorandumi tantanali ravishda imzolandi.