Bugun, 20-aprel kuni Andijon davlat tibbiyot instituti rektori M.Madazimov Markaziy ilmiy tekshirish laboratoriyasida boʻlb, ta’lim jarayonlari bilan yaqindan tanishdi hamda o‘tkazilayotgan dars mashg‘ulotlarini bevosita kuzatdi.
Uchrashuv davomida rektor talabalar bilan samimiy muloqot olib bordi. U o‘z nutqida talabalarga fanlarni chuqur va puxta o‘zlashtirish zarurligini alohida ta’kidladi. Shuningdek, darslarda muntazam ishtirok etish, vaqtga rioya qilish, kiyinish madaniyati va odob-axloq qoidalariga amal qilish, institutning ichki tartib-qoidalarini hurmat qilish har bir talabaning muhim burchi ekanini qayd etdi.
Rektor nafaqat talabalarga, balki professor-o‘qituvchilarga ham o‘z tavsiyalarini berdi. U dars mashg‘ulotlarini zamonaviy pedagogik yondashuvlar asosida tashkil etish, ta’lim sifatini oshirish, mashg‘ulotlarni yanada samarali va qiziqarli qilish bo‘yicha muhim fikrlarni ilgari surdi.
Mazkur o‘rganish jarayoni ta’lim sifatini oshirish, talabalarning bilim saviyasini yuksaltirish va ularning tarbiyasiga yanada katta e’tibor qaratish yo‘lida muhim qadam bo‘ldi. Rektor o‘z so‘zida talabalarni faqat auditoriya mashg‘ulotlari bilan cheklanib qolmaslikka chaqirdi. Ular kutubxona resurslaridan keng foydalanishlari, qo‘shimcha adabiyotlar o‘qish orqali o‘z ustida muntazam ishlashlari lozimligini alohida urg‘uladi.
Bundan tashqari, talabalarning bo‘sh vaqtlarini mazmunli tashkil etish masalasiga ham e’tibor qaratildi. Turli ilmiy, madaniy va sport to‘garaklarida faol qatnashish orqali yoshlar o‘z qiziqishlarini rivojlantirishi, iqtidorlarini namoyon etishi mumkinligi ta’kidlandi. Bu esa ularning nafaqat bilimli, balki har tomonlama barkamol shaxs bo‘lib voyaga yetishiga xizmat qiladi.
Uchrashuv yakunida talabalar o‘zlarini qiziqtirgan savollar bilan murojaat qilib, taklif va mulohazalarini bildirdilar. Rektor esa ularning fikrlarini diqqat bilan tinglab, zarur tavsiyalar berdi hamda bunday ochiq muloqotlar kelgusida ham muntazam davom etishini ma’lum qildi.
