Andijon davlat tibbiyot instituti Travmatologiya, ortopediya va neyrojarrohlik kafedrasi assistenti Azizbek Qodirov hozirgi kunda Xitoy Xalq Respublikasining nufuzli oliy ta’lim muassasalaridan biri — dunyoning Top-100 taligiga kiruvchi Zhejiang Universitetida malaka oshirmoqda.
Mazkur ilmiy-amaliy safar doirasida Azizbek Qodirov spinal jarrohlikda zamonaviy va innovatsion texnologiyalar yo‘nalishi bo‘yicha bilim va ko‘nikmalarini yanada boyitmoqda. Ushbu yo‘nalish bugungi kunda tibbiyotning eng tez rivojlanayotgan sohalaridan biri bo‘lib, unda yuqori aniqlikdagi diagnostika, raqamli texnologiyalar va minimal invaziv jarrohlik usullari keng qo‘llanilmoqda.
Malaka oshirish jarayonida mutaxassis ilg‘or texnologiyalar asosida olib borilayotgan jarrohlik amaliyotlari, yangi avlod tibbiy uskunalaridan foydalanish, shuningdek, bemorlarni davolashda individual yondashuvni shakllantirish borasida qimmatli tajriba orttirmoqda. Shu bilan birga, u xalqaro darajadagi yetakchi shifokorlar va olimlar bilan bevosita muloqot qilib, o‘zaro tajriba almashmoqda.
