Tadbirda institut rektori Madamin Madazimov, Yoshlar ittifoqi Andijon viloyati kengashi raisi Abdusamatov Shoxruxbek, Andijon viloyati jamoat tartibini saqlash boshqarmasi komandiri, podpolkovnik Otabek Saidov hamda Andijon viloyati Ichki ishlar boshqarmasi Jamoat xavfsizligi xizmati Yo‘l harakati xavfsizligi boshqarmasi Axborot xizmati bo‘lim boshlig‘i Rayimjonov Abdumajid ishtirok etib, yoshlarga samimiy tilak va ezgu niyatlarini bildirishdi.

So‘zga chiqqanlar yoshlarning jamiyatdagi o‘rni, ularning bilim olish, kasb egallash yo‘lida olib borayotgan izlanishlari, shuningdek, yurt ravnaqi yo‘lida mas’uliyat bilan yashashlari zarurligini alohida ta’kidlab o‘tishdi. Ayniqsa, yoshlar o‘rtasida huquqbuzarliklarning oldini olish, yo‘l harakati qoidalariga rioya qilish, hushyorlik va mas’uliyatni oshirish masalalariga ham alohida e’tibor qaratildi.

Tadbir davomida ma’naviy-ma’rifiy chiqishlar, foydali suhbatlar va yoshlarni vatanparvarlik ruhida tarbiyalashga qaratilgan targ‘ibot ishlari olib borildi.

“Yoshlar oqshomi”ning eng yorqin qismi esa ko‘ngilochar konsert dasturlari bo‘ldi. Unda iqtidorli talabalar tomonidan kuy-qo‘shiqlar, milliy raqslar va sahna ko‘rinishlari namoyish etilib, tomoshabinlarga yuqori kayfiyat ulashildi. Har bir chiqish yoshlik shijoati, ijodkorlik va iste’dodning yorqin ifodasi bo‘ldi.

Mazkur tadbir yoshlar uchun nafaqat bayramona hordiq, balki ularning ma’naviy dunyosini boyitish, jamoaviylik ruhini mustahkamlash va ijtimoiy faolligini oshirishga xizmat qildi. “Yoshlar oqshomi” Andijon davlat tibbiyot institutida o‘tkazilgan eng esda qolarli va ko‘tarinki ruhdagi tadbirlardan biri sifatida barchaning yodida qoldi.