Ma’lumki, Andijon davlat tibbiyot institutida talabalar ijodiy salohiyatini rivojlantirish, ularning bo‘sh vaqtini mazmunli tashkil etish hamda san’atga bo‘lgan qiziqishini oshirish maqsadida “Talabalar teatr studiyalari” faoliyat yuritib kelmoqda. Ushbu studiyalar nafaqat institut miqyosida, balki turli respublika va hududiy tanlovlarda ham faol ishtirok etib, faxrli o‘rinlarni qo‘lga kiritib kelayotgani bilan e’tiborlidir.

Institutdagi har bir fakultet qoshida alohida teatr studiyasi jamoalari shakllangan bo‘lib, ular muntazam ravishda ma’naviy-ma’rifiy tadbirlar, bayram dasturlari va turli tanlovlarda sahna ko‘rinishlari bilan ishtirok etib kelishadi. Talabalar tomonidan sahnalashtirilayotgan chiqishlar o‘zining mazmunan boyligi, badiiy ifodasi va tarbiyaviy ahamiyati bilan tomoshabinlar e’tiborini qozonmoqda.

Bugun institutda fakultetlararo talabalar teatr studiyalari jamoalari o‘rtasida buyuk sarkarda va davlat arbobi Amir Temur hayoti va faoliyatiga bag‘ishlangan sahna asarlari tanlovi bo‘lib o‘tdi. Tanlov davomida har bir jamoa Amir Temurning hayoti, uning davlat boshqaruvidagi donishmandligi, harbiy strategiyasi va yurt ravnaqi yo‘lidagi xizmatlarini turli sahna ko‘rinishlari orqali yoritib berdi. Sahna asarlarida tarixiy voqealar badiiy talqin asosida jonlantirilib, talabalarning aktyorlik mahorati, sahna madaniyati, nutq ravonligi va obrazga kirish darajasi hakamlar hay’ati tomonidan baholab borildi.