Andijon davlat tibbiyot instituti rektori M.Madazimov korrupsiyaga qarshi kurashish hamda tizimda ochiqlik va shaffoflikni ta’minlash masalalariga bag‘ishlangan yig‘ilish o‘tkazdi. Unda institutning prorektorlari, bo‘lim rahbarlari, fakultet dekanlari, kafedra mudirlari hamda mas’ul xodimlar ishtirok etdi.

Yig‘ilish davomida rektor ta’lim tizimida korrupsion holatlarning oldini olish, xodimlar va talabalarning huquqiy ongini yuksaltirish, xizmat vazifalarini vijdonan va halol bajarish masalalariga alohida e’tibor qaratdi. Shuningdek, korrupsiyaga qarshi kurashish bugungi kunning eng dolzarb vazifalaridan biri ekanini ta’kidlab, har bir rahbar o‘z faoliyatida shaffoflik va adolat tamoyillariga qat’iy amal qilishi lozimligini qayd etdi.

Shuningdek, yig‘ilishda Korrupsiyaga qarshi kurashish va Komplayens nazorat tizimini boshqarish bo‘limi boshlig‘i I.Aliboyev institutda korrupsiyaga qarshi kurashish borasida amalga oshirilayotgan ishlar, komplayens nazorat tizimining ahamiyati hamda kelgusidagi ustuvor vazifalar haqida ma’lumot berdi. U xodimlarni har qanday noqonuniy holatlarga nisbatan murosasiz bo‘lishga, tizimdagi ochiqlik va halollik muhitini mustahkamlashga chaqirdi.

Tadbir yakunida korrupsiyaning oldini olish bo‘yicha hamkorlikni yanada kuchaytirish, nazorat mexanizmlarini takomillashtirish hamda ta’lim sifatini oshirish yuzasidan tegishli topshiriq va tavsiyalar berildi.