Mazkur sport va ma’naviy-ma’rifiy tadbirlardan so‘ng talabalar uchun ko‘tarinki ruhda “Yoshlar oqshomi” tashkil etildi. Bayramona ruhda o‘tgan ushbu kecha talaba-yoshlarning kayfiyatini yanada ko‘tarib, ularning madaniy hordiq chiqarishiga xizmat qildi.

Tadbir davomida viloyatimizning xushovoz xonandalari tomonidan kuy-qo‘shiqlar ijro etildi. Jarangdor va dillarga yaqin taronalar yoshlar tomonidan katta qiziqish va olqishlar bilan kutib olindi. Musiqiy chiqishlar tadbirga o‘zgacha fayz bag‘ishlab, talabalar qalbida unutilmas taassurot qoldirdi. Shuningdek, iste’dodli yoshlar tomonidan ijro etilgan milliy va zamonaviy raqslar kechaga yanada shukuh baxsh etdi. Talabalar raqs va qo‘shiqlar orqali o‘zlarining san’atga bo‘lgan qiziqishi va iste’dodlarini namoyon etdi.

Yoshlar oqshomi davomida institutning Yoshlar masalalari va ma’naviy-ma’rifiy ishlar bo‘yicha birinchi prorektori S. Salohiddinov so‘zga chiqdi. U o‘z nutqida mamlakatimizda yoshlarga qaratilayotgan yuksak e’tibor, ular uchun yaratilayotgan keng imkoniyatlar hamda ta’lim va ilm-fan sohasidagi islohotlar haqida alohida to‘xtalib o‘tdi.

Shuningdek, talaba-yoshlarni bilim olish, chet tillarini o‘rganish, zamonaviy kasb-hunarlarni egallash hamda bo‘sh vaqtini mazmunli tashkil etishga chaqirdi. Bugungi kunda yoshlarning sport, madaniyat, san’at va innovatsion loyihalarda faol ishtirok etishi uchun barcha sharoitlar yaratilayotgani ta’kidlandi.