15-may — Xalqaro oila kuni munosabati bilan Andijon davlat tibbiyot institutida “Oila — jamiyat tayanchi, mehr-muhabbat, tarbiya va ma’naviyat maskani” mavzusida ma’naviy-ma’rifiy davra suhbati tashkil etildi.

Mazkur tadbirning asosiy maqsadi — oilaning jamiyatdagi o‘rni va ahamiyatini yanada mustahkamlash, yoshlar ongida sog‘lom oila, ma’naviy qadriyatlar va oilaviy mas’uliyat tushunchalarini shakllantirishdan iborat bo‘ldi.

Tadbirni Andijon davlat tibbiyot instituti Xotin-qizlar masalalari bo‘yicha rektor maslahatchisi G.Xolmatova kirish so‘zi bilan ochib berdi. U o‘z nutqida oila — inson kamoloti, mehr-oqibat, tarbiya va milliy qadriyatlar beshigi ekanligini, sog‘lom va mustahkam oila esa tinch va farovon jamiyatning eng muhim poydevori hisoblanishini alohida ta’kidladi.

Davra suhbatida Andijon shahar iqtisodiy sudlari sudyasi Mohina Xo‘jamberdiyeva “Nikoh va oila — Konstitutsiya va qonunlarimiz himoyasida” mavzusida ma’ruza qildi.

Ma’ruzada mamlakatimizda oila institutini mustahkamlash, xotin-qizlar va bolalar huquqlarini himoya qilish, oilaviy munosabatlarda qonun ustuvorligini ta’minlash borasida amalga oshirilayotgan islohotlar haqida atroflicha fikr yuritildi.

Tadbir davomida ishtirokchilar tomonidan oiladagi o‘zaro hurmat, farzand tarbiyasi, ma’naviy muhit hamda jamiyat taraqqiyotida oilaning o‘rni yuzasidan fikr-mulohazalar bildirildi. Samimiy va ochiq muloqot ruhida o‘tgan davra suhbati barcha ishtirokchilarda katta taassurot qoldirdi.