Andijon davlat tibbiyot instituti Farmatsiya fakulteti 1-bosqich talabalarining ota-onalari bilan uchrashuv tashkil qilindi. Uchrashuvni fakultet dekani Sh.Bozorov kirish so‘zi bilan ochib, Farmatsiya fakulteti faoliyati va hozirgi kunda erishib kelayotgan yutuqlari haqida ota-onalarga ma’lumot berdi.
Shuningdek, tadbir davomida talabalarning o‘zlashtirish ko‘rsatkichi, odob-axloqi, kiyinish madaniyati va boshqa masalalar muhokama qilindi. Fanlarni yaxshi o‘zlashtirayotgan, ma’naviy-ma’rifiy ishlarda faol ishtirok etayotgan talabalar fakultet dekani tomonidan e’tirof etilib, ularning ota-onalari tashakkurnomalar bilan taqdirlandilar.
O‘zlashtirishi past bo‘lgan talabalarning ota-onalari bilan 1-bosqich tyutori tomonidan yakka tartibda suhbat o‘tkazildi. Unda talabalarning fanlarni o‘zlashtirish ko‘rsatkichlarini oshirish va ularni faolikka chaqirish yuzasidan ota-onalar bilan birgalikda harakat qilishga kelishib, zarur rejalar tuzildi.
