Andijon davlat tibbiyot institutida “Qizlar mutolaasi” loyihasi doirasida kitobxonlikka bag‘ishlangan adabiy-ma’rifiy kecha tashkil etildi. 

Adabiy kechada institut rektori M.Madazimov, xotin-qizlar masalalari bo‘yicha rektor maslahatchisi G.Xolmatova, Axborot-resurs markazi xodimalari hamda faol talaba-qizlar ishtirok etdi. Tadbir davomida so‘zga chiqqanlar kitobning inson hayotidagi o‘rni, mutolaaning yoshlar tafakkurini shakllantirishdagi ahamiyati hamda kitobxonlik madaniyatini rivojlantirish bugungi kunning dolzarb vazifalaridan biri ekanini alohida ta’kidladi.

Shuningdek, tadbir davomida Pediatriya fakultetining 1-bosqich talabasi S.Anvarjonova tomonidan yaratilgan “Book Renaissance” loyihasi taqdimoti o‘tkazildi. Mazkur loyiha talabalarning dunyoqarashini kengaytirish, kitob o‘qishga bo‘lgan qiziqishini oshirish, notiqlik mahorati va jamoa bilan ishlash ko‘nikmalarini rivojlantirishga qaratilgani bilan ahamiyatlidir.

Loyiha doirasida talabalar o‘qigan asarlarini turli interaktiv bosqichlar orqali tahlil qilishadi. Jumladan, “Adabiy duel”, “Ashyoviy dalil” hamda “Adabiy sud” kabi qiziqarli va innovatsion bosqichlar orqali kitob mazmuni yodga olinadi, qahramonlar xarakteri muhokama qilinadi hamda asar g‘oyasi yuzasidan fikr almashiladi. Ushbu usullar talabalarni erkin fikrlashga, o‘z nuqtayi nazarini asosli tarzda bayon etishga va tanqidiy tahlil qilishga undaydi.

Tadbir davomida talaba-qizlar o‘zlari mutolaa qilgan badiiy asarlar haqida fikr bildirib, ularning mazmun-mohiyatini tahlil qildilar hamda tengdoshlariga tavsiya etdilar. Ayniqsa, kitoblar orqali hayotiy saboq olish, insoniy fazilatlarni shakllantirish va ma’naviy barkamollikka erishish masalalari keng muhokama qilindi.