Mustaqilligimizning 35 yilligi hamda “Dolzarb 90 kun” loyihasi doirasida Andijon davlat tibbiyot instituti va Talabalar turar joyi atrofidagi 10 ta mahallada istiqomat qiluvchi uyushmagan yoshlar o‘rtasida “Rektor kubogi” sport musobaqalariga tantanali ravishda start berildi.

Yoshlarni mazkur sport musobaqalari bilan institut rektori nomidan Yoshlar masalalari va maʼnaviy-maʼrifiy ishlar boʻyicha birinchi prorektor S.Salohiddinov tabrikladi.

Mazkur sport musobaqalari yoshlarning bo‘sh vaqtini mazmunli tashkil etish, ularni sog‘lom turmush tarziga jalb etish, sportga bo‘lgan qiziqishini yanada oshirish hamda mahallalardagi yoshlar o‘rtasida do‘stlik va hamjihatlik muhitini mustahkamlash maqsadida tashkil etilmoqda.

Musobaqalar stol tennisi, mini futbol hamda shaxmat-shashka yo‘nalishlari bo‘yicha o‘tkazilib, unda yuzlab yoshlar o‘z mahorat va salohiyatlarini namoyon etish imkoniyatiga ega bo‘ladilar. Bellashuvlar yoz mavsumi davomida bosqichma-bosqich tashkil etilib, har bir sport turi bo‘yicha eng kuchli ishtirokchilar aniqlanadi.

“Rektor kubogi” musobaqalari yoshlar o‘rtasida sog‘lom raqobat muhitini shakllantirish, ularning jismoniy va intellektual salohiyatini rivojlantirish hamda vatanparvarlik ruhini yuksaltirishga xizmat qilishi bilan ahamiyatlidir.