Andijon davlat tibbiyot instituti tomonidan Mustaqilligimizning 35 yilligi, “Payshanba – yoshlar kuni”, “Dolzarb 90 kun” loyihasi hamda rektorning sayyor qabuli doirasida Bo‘ston tumani “Yangiobod” OShPda chuqurlashtirilgan tibbiy ko‘rik tashkil etildi.

Tadbir davomida institutning malakali professor-o‘qituvchilari va shifokorlari ishtirokida 18 turdagi mutaxassislar tomonidan 245 nafar aholi tibbiy ko‘rikdan o‘tkazildi. Fuqarolarning salomatlik holati har tomonlama o‘rganilib, zarur diagnostik tekshiruvlar amalga oshirildi.

Unda 38 nafar fuqaro UZI tekshiruvidan o‘tkazildi, 41 nafar fuqaroning EKG tekshiruvi amalga oshirildi, qo‘shimcha davolanish va chuqur tekshiruv talab etilgan bemorlarga 6 ta tuman tibbiyot muassasalariga hamda 3 ta viloyat ixtisoslashtirilgan muassasalariga yo‘llanmalar berildi. Shuningdek, aholiga bepul dori vositalari tarqatildi, har bir bemorga tibbiy ko‘rik natijalariga ko‘ra individual tavsiyalar va zarur maslahatlar berildi.

Mazkur xayrli tadbir aholining tibbiy madaniyatini oshirish, kasalliklarni erta aniqlash va ularning oldini olish, shuningdek, sifatli tibbiy xizmatlarni aholiga yaqinlashtirishga xizmat qildi.

Inson salomatligi va farovonligi yo‘lida amalga oshirilayotgan bunday ezgu tashabbuslar yurtimizda “Inson qadri uchun” tamoyili amalda o‘z ifodasini topayotganining yana bir yorqin namunasidir.