Payshanba – Yoshlar kuni munosabati bilan Andijon davlat tibbiyot instituti rektori M.Madazimov boshchiligida prorektorlar ishtirokida Qo‘rg‘ontepa tumanida sayyor qabul tashkil etildi. Mazkur uchrashuvning asosiy maqsadi yoshlar bilan ochiq muloqot qilish, ularni qiynayotgan muammolarni joyida o‘rganish hamda mavjud masalalarga amaliy yechim topishdan iborat bo‘ldi.

Sayyor qabul davomida Qo‘rg‘ontepa tumanidagi Andijon davlat tibbiyot institutiga biriktirilgan "Obodon" mahalla fuqarolar yig‘inida istiqomat qiluvchi 5 nafar yosh bilan yakka tartibda suhbat o‘tkazildi. Uchrashuvda yoshlarning bandligi, sog‘lig‘i, ijtimoiy qo‘llab-quvvatlash, ta’lim va kasb-hunar egallash bilan bog‘liq murojaatlari hamda takliflari atroflicha tinglandi.

Har bir murojaat mutasaddilar tomonidan alohida ko‘rib chiqilib, ularni ijobiy hal etish yuzasidan aniq chora-tadbirlar belgilandi. Xususan, 2 nafar yoshning bandligi ta’minlanib, ularni ish bilan ta’minlash bo‘yicha amaliy yordam ko‘rsatildi. Yana 2 nafar murojaatchiga malakali mutaxassislar tomonidan zarur tibbiy ko‘rik va maslahatlar berilib, keyingi davolanish jarayonlarini tashkil etish bo‘yicha amaliy ko‘mak ko‘rsatildi. Shuningdek, 1 nafar yoshning ijtimoiy muammosi o‘rganilib, unga tegishli tartibda ijtimoiy yordam ajratish masalasi ijobiy hal etildi.

Uchrashuv davomida institut rahbariyati yoshlarni har tomonlama qo‘llab-quvvatlash, ularning salohiyatini ro‘yobga chiqarish, bandligini ta’minlash, sifatli tibbiy xizmatdan foydalanish imkoniyatlarini kengaytirish hamda ijtimoiy himoyaga muhtoj yoshlarning muammolarini o‘z vaqtida hal etish davlat siyosatining ustuvor yo‘nalishlaridan biri ekanini alohida ta’kidladi.