Joriy yilning 12–25-iyul kunlari Andijon davlat tibbiyot instituti professor-o‘qituvchilari, tyutorlari hamda talabalari Janubiy Koreyaning Daegu Haany universitetida tashkil etilgan xalqaro yozgi amaliyot va malaka oshirish dasturida faol ishtirok etdi.

Dastur davomida ishtirokchilar malakali professor-o‘qituvchilar va soha mutaxassislari tomonidan tashkil etilgan ma’ruzalar, amaliy mashg‘ulotlar, laboratoriya ishlari, klinik kuzatuvlar, ilmiy-amaliy seminarlar hamda tajriba almashish uchrashuvlarida faol qatnashdilar. Shuningdek, universitetning ilmiy markazlari, klinikalari va laboratoriyalariga tashrif buyurib, zamonaviy tibbiy jarayonlar bilan yaqindan tanishish imkoniyatiga ega bo‘ldi.

Alohida e’tibor Herbal Medicine — dorivor o‘simliklar va an’anaviy koreys tabobati yo‘nalishiga qaratilib, ishtirokchilarga dorivor o‘simliklarning shifobaxsh xususiyatlari, ularning tibbiyotdagi qo‘llanilishi hamda an’anaviy va zamonaviy davolash usullarini uyg‘unlashtirish bo‘yicha nazariy va amaliy bilimlar berildi.

Xalqaro dastur ishtirokchilarga Janubiy Koreyaning ilg‘or tibbiy ta’lim tizimi, innovatsion diagnostika va davolash usullari, zamonaviy tibbiy texnologiyalar, raqamli tibbiyot hamda ilg‘or pedagogik yondashuvlar bo‘yicha xalqaro tajribani o‘rganish imkonini berdi.

Mazkur yozgi amaliyot va Malaka oshirish dasturi xalqaro akademik va ilmiy hamkorlikni kengaytirish, ishtirokchilarning kasbiy kompetensiyalarini rivojlantirish, ilg‘or xorijiy tajribani o‘zlashtirish hamda kelgusida qo‘shma ta’lim va ilmiy loyihalarni amalga oshirish uchun mustahkam zamin yaratdi.