Andijon davlat tibbiyot instituti rektori M.Madazimov institutning klinik bazalarida olib borilayotgan ishlar, tibbiy xizmat ko‘rsatish sifati hamda talabalar uchun yaratilayotgan amaliy ta’lim imkoniyatlarini o‘rganish maqsadida bir qator tibbiyot muassasalarida bo‘ldi.
Dastlab, rektor Andijon viloyati bolalar ko‘p tarmoqli tibbiyot markazi faoliyati bilan yaqindan tanishdi. Tadbir davomida markazning qabulxonasi, kardiologiya va urologiya bo‘limlaridagi ish jarayonlari ko‘zdan kechirildi.
Bo‘limlarda bemorlarni qabul qilish, tashxislash va davolash jarayonlari, shifokorlar faoliyati hamda zamonaviy tibbiy xizmatlarni tashkil etish masalalariga alohida e’tibor qaratildi. Shuningdek, talabalar uchun amaliy ko‘nikmalarni shakllantirish, nazariy bilimlarni klinik amaliyot bilan uyg‘unlashtirish borasida amalga oshirilayotgan ishlar muhokama qilindi.
Shuningdek, Diagnostika markazi faoliyati ham o‘rganilib, bemorlarni tekshirish va ularga tashxis qo‘yish jarayonlari bilan tanishildi. Markazda mavjud tibbiy diagnostika imkoniyatlaridan samarali foydalanish, zamonaviy usullarni amaliyotga keng joriy etish hamda talabalarning klinik ko‘nikmalarini rivojlantirish masalalariga e’tibor qaratildi.
Navbatdagi manzil Farmstandart rentgen markazida bo‘lib, diagnostika xizmatlarining tashkil etilishi, zamonaviy tibbiy uskunalardan foydalanish va bemorlarga ko‘rsatilayotgan xizmatlar sifati bilan tanishildi.
Rektor tanishuv davomida Andijon viloyati ko‘p tarmoqli tibbiyot markazida ham bo‘ldi. Markazda bemorlar ko‘rigi, davolash jarayonlari hamda tibbiyot institutining talabalarini amaliyotga jalb etish masalalari o‘rganildi.
Ayniqsa, tibbiyot ta’limida dual ta’lim tizimini samarali tashkil etish, talabalarning bevosita klinik muhitda amaliy ko‘nikmalarini shakllantirish va ularni kelgusidagi kasbiy faoliyatga tayyorlash masalalariga alohida urg‘u berildi.
Jarayon davomida talabalar va yosh mutaxassislar bilan ham suhbatlashildi. Ularga tibbiyot sohasida chuqur bilim olish, zamonaviy tibbiy texnologiyalarni puxta o‘zlashtirish, bemorlar bilan muloqot madaniyatiga rioya qilish hamda o‘z ustida muntazam ishlash yuzasidan tavsiyalar berildi.
Rektor yoshlarni o‘z kasbiga sadoqatli, bilimli va mas’uliyatli mutaxassis bo‘lib yetishishga, amaliy mashg‘ulotlardan unumli foydalanishga hamda ustoz-shogird an’analarini davom ettirishga chaqirdi.
Yakunda tibbiyot muassasalarida talabalar uchun amaliy ta’lim sharoitlarini yanada takomillashtirish, dual ta’lim jarayonlarini samarali tashkil etish, klinik bazalar bilan hamkorlikni kuchaytirish hamda tibbiy xizmat sifatini oshirish bo‘yicha tegishli vazifalar belgilab olindi.
Andijon davlat tibbiyot instituti tomonidan ta’lim va amaliyot uyg‘unligini ta’minlash, bo‘lajak shifokorlarning kasbiy kompetensiyalarini rivojlantirish hamda ularni zamonaviy tibbiyot talablariga javob beradigan yetuk mutaxassislar etib tayyorlash borasidagi ishlar izchil davom ettirilmoqda.
