O‘zbekiston Respublikasi Prezidentining 2026-yil 3-martdagi “Ayollar va bolalar huquqlarining himoyasini kuchaytirish hamda ularga nisbatan tazyiq va zo‘ravonlik holatlarining oldini olish bo‘yicha qo‘shimcha tashkiliy-huquqiy choralar to‘g‘risida”gi PF-33-son Farmoni mamlakatimizda inson huquqlarini ta’minlash, ayniqsa xotin-qizlar va bolalarni har tomonlama qo‘llab-quvvatlash borasida muhim qadam bo‘ldi.
Mazkur farmon mazmun-mohiyatini keng jamoatchilikka yetkazish maqsadida hududiy targ‘ibot guruhlari shakllantirilib, joylarda tizimli targ‘ibot ishlari olib borilmoqda. Ana shunday tadbirlardan biri Andijon davlat tibbiyot institutida tashkil etildi.
Institutda o‘tkazilgan davra suhbatida respublika darajasidagi mas’ul rahbarlar hamda mutaxassislar ishtirok etib, farmonning asosiy yo‘nalishlari, uning amaliy ahamiyati va jamiyat hayotidagi o‘rni haqida atroflicha ma’lumot berdi.
Tadbirda Kambag’allikni qisqarttirish va bandlik vazirining o’rinbosari, guruh rahbari R.Turdiboyeva, Ichki ishlar vazirligi Huquqbuzarliklar profilaktikasi xizmati boshlig’ining o’rinbosari N.Giyasova, Viloyat hokimining oʻrinbosari, Oila va xotin-qizlar boshqarmasi boshligʻi N.Yunusova ishtirok etdi.
Tadbirni Andijon davlat tibbiyot instituti rektorining xotin-qizlar masalalari bo‘yicha maslahatchisi G.Xolmatova ochib berib, mazkur farmonning ahamiyati, uning institut miqyosida ijrosini ta’minlash yuzasidan olib borilayotgan ishlar haqida to‘xtalib o‘tdi.
Shundan so‘ng mutaxassislar o‘z nutqlarida ayollarni ijtimoiy himoya qilish, ularning bandligini ta’minlash va iqtisodiy mustaqilligini oshirish masalalariga alohida to‘xtalib o‘tishdi. Shuningdek, ayollar va bolalarga nisbatan tazyiq va zo‘ravonlik holatlarining oldini olish bo‘yicha amalga oshirilayotgan profilaktik choralar, yosh qizlarning kasb-hunar egallashi, ularni zamonaviy bilim va ko‘nikmalar bilan ta’minlash orqali mustaqil hayotga tayyorlash masalalariga urg‘u berdi. Shuningdek, davra suhbati davomida ishtirokchilar tomonidan ayollar va bolalar huquqlarini himoya qilish, ularning manfaatlarini ta’minlash, jamiyatda sog‘lom ijtimoiy muhitni shakllantirish borasida fikr-mulohazalar bildirildi. Shuningdek, talaba-yoshlarni huquqiy madaniyatini oshirish, ularni zo‘ravonlikka qarshi murosasiz ruhda tarbiyalash masalalari ham keng muhokama qilindi.
Yakunda tadbir ishtirokchilari bunday targ‘ibot ishlari aholining huquqiy ongi va madaniyatini oshirishda muhim o‘rin tutishini alohida ta’kidlab, bu boradagi ishlarni izchil davom ettirish zarurligini qayd etdi.
